by aimee | Dec 10, 2013 | Headlines, National News
MANILA, Dec. 10 (PIA)–Opisyal nang gitudlo ni Presidente Benigno ‘Noynoy’ Aquino III si kanhi Senador Panfilo Lacson III isip Presidential Assistant for Rehabilitation and Recovery.
Sa gipagawas nga Memorandum Order No. 62, nakalatid didto ang mga katungdanan ni Lacson gamit ang iyang bag-ong posisyon nga adunay cabinet rank ubos sa Office of the President.
Usa sa mahinongdanong katungdanan niini ang mahimong over-all manager ug coordinator sa rehabilitation, recovery ug reconstruction efforts sa government department ug ahensiya sa gobyerno.
Partikular nga pagatutokan ni Lacson ang mga lugar nga naapektuhan sa bagyong Yolanda nga mao ang Samar, Leyte, Negros, Cebu, Bohol, Capiz, Aklan, Antique, Iloilo ug Palawan.
Giingong kinahanglan usab makig-alayon si Lacson sa National Disaster Risk Reduction and Management Council (NDRRMC) ug mga ahensiya sa gobyerno nga miyembro niini ug mopahigayon og konsultasyon sa mga hingtungdang Local Government Units (LGUs) sa aspeto sa plano ug programa alang sa rehabilitasyon, recovery ug development sa mga naapektuhang lugar sa bagyong Yolanda.
Apil na usab niini ang over-all strategic vision ug integrated short-term, medium-term ug long-term programs nga iduso kang Presidente Aquino alang sa iyang pagtugot.
Samtang gitudlo usab ni Presidente Aquino si kanhi Chief Operating Officer sa Eton Property Phil. Inc. nga si Danilo A. Antonio isip Undersecretary ni Lacson.
Tungod niini, ang tanang departamento, ahensiya, apil na ang GOCCs , GFIs ug pribadong sektor gimanduan nga suportaan ug tabangan si Lacson isip bag-ong Presidential Assistant for Rehabilitation and Recovery. (PIA7-Bohol/ECB)
by aimee | Dec 10, 2013 | National News
MANILA, Dec. 10 (PIA)–Motambong si Presidente Benigno ‘Noynoy’ Aquino III sa 40th ASEAN-Japan Commemorative Summit nga ipahigayon sa Disyembre 12 hangtud 14 sa Tokyo, Japan.
Matud pa ni Department of Foreign Affairs (DFA) Assistant Secretary Raul Hernandez, hisgotan sa maong summit ang pagpalig-on sa maayong relasyon dungan sa pagtubag sa regional ug international issues.
Giingong sa pag-abot ni Presidente Aquino ug iyang delegado sa Tokyo sa Disyembre 12, sugaton sila dayon og pipila ka bilateral Philippine-Japan events ug meetings ug mga kalihokan nga adunay kalabotan sa ASEAN-Japan Commemorative Summit nga ang aktuwal nga iskedyul sa Disyembre 13 ug 14.
Sa Disyembre 13 (Biyernes), ang Presidente ug ang uban pang ASEAN leaders motambong sa usa ka afternoon tea ceremony nga i-host sa ilang Majesties, Emperor Akihito ug Empress Michiko.
Dili kini usa ka traditional Japanese tea ceremony tungod kay susama lang kini sa usa ka “meet-and-greet high tea” nga molanat og 30 minutos.
Sa gabii nianang adlawa, mo-host og usa ka panihapon sila Prime Minister Shinzo Abe ug Madame Akie Abe alang sa ASEAN Leaders ug sa mga kapikas niini sa kinabuhi.
Samtang sa Disyembre 14 (Sabado), aktuwal nga adlaw sa Commemorative Summit-Session 1 nga ipahigayon sa buntag ug tukion dinhi ang mga mahinungdanong hisgotanan tali sa mga lider sa ASEAN ug Japan.
Sundan kini dayon og paniudto nga ang Nippon Keidanren (Japanese Business Federation) ang mo-host.
Giingong adunay duha ka outcome documents gikan niining summit– ang Vision Statement of ASEAN-Japan Friendship and Cooperation and its Implementation Plan ug ang Joint Statement of the ASEAN-Japan Summit.
Sa maong panagpulong giingong tukion sa duha ka lider ang kalabot sa disaster management ug reconstruction kabahin sa Typhoon Yolanda, economic concerns, maritime cooperation, people-to-people exchanges ug ang Mindanao peace process.
Magbinay-loay usab ang duha ka lider sa ilang mga opinyon ug panglantaw kalabot sa gipatuman nga regional issues sa duha ka nasud. (PIA7-Bohol/ECB)
by aimee | Dec 5, 2013 | National News
MANILA, Dec. 05 (PIA)–Gitudlo ni Presidente Benigno “Noynoy” Aquino III isip officer-in-charge sa Bureau of Customs si Finance Undersecretary John Sevilla human niluwat sa pangatungdanan si Customs Commissioner Ruffy Biazon niadtong Lunes human gilambigit sa pork barrel scam.
Masaligon si Finance Chief Cesar Purisima kang Sevilla isip OIC sa Customs tungod kay giingong hanas kini sa ekonomiya, international relations ug sa pagpatuman sa mga proyekto.
Sa wala pa nahimong Finance Undersecretary, nahimong Executive Director si Sevilla sa Goldman Saks ug Associate Director sa rating agency nga Standard and Poor’s. (PIA-Bohol/ecb)
by aimee | Nov 29, 2013 | Headlines, National News
TAGBILARAN CITY, Nov. 29 (PIA)–Gimando karon ni Presidente Benigno “Noynoy” Aquino III sa tanang mga government financial institutions (GFIs) ang pagpatuman sa unom ka buwang moratorium sa paningil og loan payments ug paghatag og interest-free loans sa mga residente o negosyanteng direktang naigo sa bagyong “Yolanda”.
Nahisulod kini sa Memorandum Circular No. 59 nga gilagdaan sa Presidente niadtong Nobyembre 26 nga gipagawas na karon sa Malakanyang.
Apil niining kamanduan ang Land Bank of the Philippines (LBP), Development Bank of the Philippines (DBP), Government Service Insurance System (GSIS), Social Security System (SSS), National Home Mortgage Finance Corporation-PAGIBIG, People’s Credit and Finance Corporation, Philippine Postal Savings Bank, Philippine Retirement Authority, Quedan Rural Credit and Guaranty Corporation ug United Coconut Planters Bank.
Tuyo niining matabangan ang mga biktima nga makuhaan ang ilang problema ug makabawi sa gidangatan nga trahedya. (PIA7-Bohol/ECB)
by aimee | Nov 29, 2013 | National News
TAGBILARAN CITY, Nov. 29 (PIA)–Gitataw ni Presidente Benigno “Noynoy” Aquino III nga walay angay ikabalaka sa napabalitang adunay Chinese aircraft carrier nga naa sa West Philippine Sea.
Atol sa media interaction sa Presidente nga gipahigayon sa Bohol Tropics Resort sa syudad sa Tagbilaran kagahapon sa buntag, gipasabot niini nga dili hulga sa seguridad sa nasud ang maong balita tungod kay wala kini sa territorial waters sa West Philippine Sea apan anaa sa High Seas.
Dugang pa sa Presidente, gi-angkon man sa China nga dili pa kini operational ug nagpahigayon lamang kini og pagbansay-bansay sa carrier operations.
Gipahayag sa Presidente nga matawag kining innocent passage mao nga dili angay padak-on o ikabalaka.
“Let’s not play it up. I think the Chinese themselves have admitted that this is a… They are not yet fully operational eh. Is it two or three years ba before they believe that they will be fully operational. Ibig sabihin ‘non, they’re learning carrier operations, both the crews onboard the planes and also the pilots who will be flying the planes. So they are transitting here, dahil hindi pa sila operational, why should anybody consider it a threat?” matud pa ni Presidente Aquino. (PIA7-Bohol/ECB)
by aimee | Nov 29, 2013 | Headlines, National News
TAGBILARAN CITY, Nov. 29 (PIA)–Giseguro ni Presidente Benigno “Noynoy” Aquino III nga lig-on ang mga inprastrakturang ipatukod dungan sa pasalig nga subling ipatindog ang mga naguba o nahugnong mga inprastraktura tungod sa linog nga nitay-og sa lalawigan niadtong Oktubre 15.
“Rebuild all that needs to be rebuilt but in a much better condition so they would be able to withstand natural calamities, ” matud pa ni PNoy atol sa gipahigayong media interaction kagahapon nga gipahigayon sa Bohol Tropics Resort ning syudad sa Tagbilaran.
Matud pa ni PNoy nga ang duha ka tulay nga gihimo karon sa Bohol kasamtangan lamang human kini nahugno tungod sa magnitude-7.2 nga linog sa niaging buwan.
“Temporary bridges were being inaugurated today. Bakit temporary? Kasi maraming tests na kailangang gawin pa. Tests to make sure na ito ba ay ang best site,” pasabot ni PNoy.
Gipasalig pa ni PNoy nga mahuman ang permanenteng Abatan bridge sa Setyembre 2016.
Samtang gitahasan sa Presidente ang Department of Health (DoH) sa pagtukod og bag-ong district hospital sa Loon, human nahugno usab sa linog ang Congressman Castillo Memorial Hospital sa maong lungsod.
“Pati hospitals… I tasked DOH to make sure that program to build a new one, perhaps in a different location,” pagbutyag sa Presidente.
Ang National Housing Authority (NHA) ug Department of Social Welfare and Development (DSWD) usab ang giingong mamahala sa mga residente nga wala pay mapuy-an human sa bagyong “Yolanda.”
Samtang masaligon ang Presidente nga mabalik na sa ubang lugar sa Visayas region ang suplay sa kuryente sa Disyembre.
Gipasalig sa Presidenteo nga adunay igong pondo nga gigahin ang gobyerno alang sa rehabilitasyon sa mga lugar nga naigo sa niaging mga kalamidad. (PIA7-Bohol/ECB)
