by aimee | May 30, 2013 | National News
TAGBILARAN CITY, Bohol, May 30 (PIA)–Nalabwan pa karon sa Pilipinas ang mga major economies sa tibuok East ug Southeast Asian regions, human nakatala og 7.8 percent growth ang ekonomiya sa unang quarter ning tuig.
Matud pa ni Socioeconomic Planning Secretary Arsenio Balisacan, ang maong rekord mas taas pa sa performance sa Indonesia, Thailand, Vietnam ug China.
Alang ning quarter, nitala lamang ang Indonesia og economic growth nga 6%, samtang ang Thailand naa sa 5.7% ug 4.9 % usab ang Vietnam.
Ang major economic player nga China nakatala lamang og 7.7 percent growth.
Gitumbok ni Balisacan nga dakung factor sa paglambo sa ekonomiya ang kusog nga performance sa manufacturing ug construction sector ug ang dakung consumer ug government spending.
Gibutyag usab sa National Statistical Coordination Board (NSCB) nga ang 7.8% nga paglambo makonsederar nga labing dakung quarterly Gross Domestic Product (GDP) growth sa nasud sukad niadtong 2010.
Kalabot niini, naglaum ang NSCB nga malabwan pa sa Pilipinas ang maong rekord sa pagtapos ning tuig. (PIA-Bohol/ecb)
Amyenda sa Family Code, gilagdaan na ni PNoy
TAGBILARAN CITY, Bohol, May 30 (PIA)–Gilagdaan na ni Presidente Benigno ‘Noynoy’ Aquino III ang pag-amyenda sa Family Code diin gi-luagan na ang probisyon kalabot sa conjugal property sa mga magtiayon.
Nahisulod kini sa Republic Act 10572 o ang “An Act Establishing the Liability of the Absolute Community or Conjugal Partnership for an Obligation of a Spouse who Practices a Profession and the Capability of Either Spouse to Dispose of an Exclusive Property”.
Base sa Article 73 ug Article 111 sa maong balaod, dili na kinahanglang mangayo pa og pagtugot ang asawa sa iyang kapikas kun unsa ang gusto niining sudlan nga trabaho, negosyo ug aktibidad.
Mahimong mobabag ang asawa kun may balido, seryoso ug moral grounds kini nga ang korte lamang ang mahimong magdesisyon
Ubos sa Article 111, gitugotan nang i-prenda o ibaligya sa usa ka asawa ang iyang ‘exclusive property’ bisan wala kini consent sa iyang kapikas kun naa na kini sa saktong pangedaron. (PIA-Bohol/ecb)
by aimee | May 28, 2013 | National News
TAGBILARAN CITY, Bohol, May 28 (PIA)–Gidawat sa Pilipinas ang New Frontiers Award 2013 gikan sa Arabian Travel Market (ATM) nga gi-ilang premier travel ug tourism exhibition sa Middle East.
Gi-ila sa maong award giving body ang padayon nga pagbangon sa nasud sa pag-igo sa Bagyong Pablo (international name: Bopha) niadtong Disyembre 2012.
“The Philippines, its government and its people, has shown remarkable fortitude and a stoic determination to get both communities and the local economy back on track following the devastation wreaked by Typhoon Bopha late last year, and their resilience in the face of such a monumental crisis is commendable,” matud pa ni Mark Walsh, Portfolio Director sa Reed Travel Exhibitions sa iyang pagtunol sa kristal nga tropeo.
Ang maong award ginahatag sa mga destinasyong nagpakita og “great adversity to rebound its tourism industries. The award also gives tribute to the resilience of local communities to rebuild their lives, as well as bring attention to the crisis management and risk reduction practices of local authorities.”
Kauban sa Pilipinas sa shortlist ang New York State tungod sa Hurricane Sandy ug Pakistan tungod sa grabeng baha nga nasinati nila niadtong 2012.
Nanguna sa delegasyon sa nasud si Department of Tourism (DOT) Assistant Secretary Benito C. Bengzon, Jr. sa pagdawat sa maong award.
Gawas sa tropeo, nakadawat usab ang nasud sa Pilipinas og libreng exhibition space sa ATM nga nagkantidad og US$10,000. (PIA-Bohol/ecb/p-gg)
by aimee | May 28, 2013 | National News
TAGBILARAN CITY, Bohol, May 28 (PIA)–Gideklarar ni Presidente Benigno ‘Noynoy’ Aquino III ang adlaw nga natawhan sa iyang amahan nga si Sen. Ninoy Aquino Jr. nga “Araw ng Pagbasa” matag tuig ug usa kini ka regular working holiday.
Gilagdaan ni Presidente Aquino ang Republic Act 10556 diin gitahasan niini ang Department of Education (DepEd) nga maoy manguna sa ‘story-telling and reading sessions’ sa tanang tunghaan sa elementarya ug high school sa tibuok tuig matag Nobyembre 27 sa tuig nga maoy adlaw nga natawhan ni kanhi Sen. Ninoy Aquino.
Gi-aghat usab sa maong balaod ang tanang tunghaan nga gamiton ang pinolongan sa ilang rehiyon isip dugang sa Filipino ug English sa mga kalihokan matag “Adlaw ng Pagbasa” o adlaw sa pagbasa.
Ang pagdeklarar sa “Araw ng Pagbasa” nisubay sa katuyoan sa Philippine Book Development Month nga gisaulog matag Nobyembre agig padsunod sa Presidential Proclamation No. 1436 nga gilagdaan niadtong 2008.
Giingong dili lamang ang pagbuwis sa iyang kinabuhi aron mabalik ang demokrasya sa nasud ang angay natong mahinumdoman kang Ninoy, apan apil na usab ang iyang hilig sa pagbasa nga maoy nihulma sa iyang papel sa pagbatok sa diktadurang Marcos. (PIA-Bohol/ecb/p-gg)
by aimee | May 27, 2013 | National News
TAGBILARAN CITY, Bohol, May 27 (PIA)–Gawas sa hugot nga seguridad, gimanduan sa Malakanyang ang pamunuan sa Philippine National Police (PNP) nga mas hingosgan pa ang intelligence gathering karong andam na ang pagbukas sa klase karong Lunes.
Matud pa ni Communications Group Secretary Sonny Coloma, mahinungdanong masiguro sa kapolisan nga mahimong luwas ang mga estudyante ug dili mapahimoslan sa mga dautang tawo ug mga sindikato nga nahilambigit sa droga.
Si Coloma nagkanayon nga salig si Presidente Benigno ‘Noynoy’ Aquino III sa katakus sa PNP nga masumpo ang mga dautang tawo sama sa mga sindikato tungod kay dili na bag-o kanila ang maong direktiba.
Bisan una nang gipahayag sa PNP nga mius-os sa 60 porsyento ang crime rate sa nasud sa niaging unang mga buwan ning tuig, nagpadayon gihapong dakung problema ang paggamit sa iligal nga droga sa nasud base sa gipahigayong imbestigasyon sa House committee on illegal drugs ubos sa 15th Congress. (PIA-Bohol/ecb/i-gg)
Taiwanese investigators, nakigpulong na sa NBI
TAGBILARAN CITY, Bohol, May 27 (PIA)–Gawasnon ra nga makakuha og gikinahanglang detalye kalabot sa pagkamatay sa usa ka mangingisdang Taiwanese sa Balintang Channel ang mga Taiwanese investigators.
Kini ang giseguro ni National Bureau of Investigation (NBI) Dir. Nunatos Cezar Rojas sa pag-abot sa nasud sa mga Taiwanese investigators sakay sa China Airlines flight 701 ganinang buntag.
Dungan usab niini ang pag-abot sa mga imbestigador sa NBI sa Taipei alang sa kaugalingon niining imbestigasyon.
Samtang matud pa ni Simon Lee, section chief sa First Division sa Taiwan Criminal Investigation Bureau, vital information lamang ang ilang target, apil na ang berepikasyon sa existing data sa NBI mao nga naghinaot silang dili mahimong komplekado ang parallel investigation.
Nakigpulong dayon ang Taiwanese team kang Rojas sa usa ka close door meeting ganinang buntag.
Apan wala una nihatag og time table ang NBI alang sa himuong imbestigasyon sa mga banyaga. (PIA-Bohol/ecb/i-sjp)
by aimee | May 27, 2013 | National News
TAGBILARAN CITY, Bohol, May 27 (PIA)–Nanawagan ang Malakanyang sa tanang mga Pilipino sa pagbitay sa nasudnong bandila sa ilang mga panimalay, opisina, eskwelahan, public buildings ug plaza, apil na sa mga embahada ug konsulada sugod ugma, Mayo 28 hangtud Hunyo 12 agig pagsaulog sa National Flag Days.
Matud pa ni Deputy Presidential Spokesperson Abigail Valte, gi-awhag sa gobyerno ang tanang Pilipino sa pagduyog sa National Flag Days agig pagpangandam alang sa Independence Day celebration sa Hunyo 12.
“Kasi dito sa atin it’s not just a flag day, these are flag days. So from May 28 to June 12 po ang flag days natin. Meron pong project ang Presidential Museum and Library at ang Official Gazette, magkakaroon po tayo ng, as usual, iyong mga infographics po tungkol dito starting on May 28 hanggang June 12, matud pa ni Valte.
Isaulog sa nasud ang Flag Days agig pagtimaan sa Battle of Alapan niadtong May 28, 1898 diin ang Philippine Revolutionary Army nga gipangunahan ni General Emilio Aguinaldo mipukan sa Spanish forces. Kini usab ang labing unang higayon diin gibitay ang Philippine National Flag sa Teatro Caviteno sa syudad sa Cavite.
Gi-awhag ang mga Pilipino nga mosalmot sa National Flag Days agig pagsunod sa Section 26 of Republic Act 8491 o gitawag nga “Flag and Heraldic Code of the Philippines,” nga nagmando sa mga buhatan ug pampublikong lugar sa pagbitay sa nasudnong bandila. (PIA-Bohol/ecb/p-gg)
by aimee | May 24, 2013 | Headlines, National News
TAGBILARAN CITY, Bohol, May 24 (PIA)–Gilagdaan ni Presidente Benigno ‘Noynoy’ Aquino lll ang Republic Act 10535 nga nagtakda sa Philippine Standard Time (PST).
Base sa maong balaod, gimanduan ang tanang ahensya sa gobyerno ug local government units nga gamiton na ang PST nga itakda sa PAGASA-DOST.
Matud pa ni Deputy Presidential Spokesperson Abigail Valte, ang RA 10535 o PST Act of 2013 gilagdaan sa Presidente niadtong Mayo 15.
Kinahanglang makig-alayon ang tanang ahensya ug LGU’s apil na usab ang mga tunghaan, pribadong opisina, TV ug radio stations sa PAGASA-DOST aron ma-synchronized ang ilang official time piece ug devices matag buwan.
Pahamtangan og multa nga gikan P30,000 hangtud P50,000 sa 1st offense ug cancellation sa ilang prangkisa sa 2nd offence ang mga tag-iya og TV ug radio stations nga pakyas itakda ang ilang orasan base sa PST sa ilang mga broadcast.
Nakalatid usab sa maong balaod nga isaulog ang National Time Consciousness Week kada unang semana matag tuig.
Alang sa iksaktong pagtakda sa oras, mahimo kining makita sa website sa PAGASA-DOST nga http://kidlat.pagasa.dost.gov.ph/ourtime.shtml. (PIA-Bohol/ecb/i-gg)
PNoy, gilagdaan na ang balaodnon nga mopahamtang
og bug-at nga silot sa mga mamaligya og ‘botcha’
TAGBILARAN CITY, Bohol, May 24 (PIA)–Mokabat P100,000 hangtud P1 milyon ang multa ug pagkabilanggo gikan 6 hangtud 12 ka tuig ang silot sa masakpang mamaligya og ‘botcha’ o double dead nga karne sa merkado.
Kini human gilagdaan ni Presidente Benigno ‘Noynoy’ Aquino III ang usa ka balaodnon aron mapabug-at ang silot sa mga mamaligya og ‘botcha’.
Matud pa ni Deputy Presidential Spokesperson Abigail Valte, gilagdaan sa Presidente niadtong Mayo 15 ang Republic Act No. 10536 aron amyendahan ang National Meat Inspection Code of the Philippines.
Nanghinaot si Valte nga sa paglagda niining bag-ong balaod, makuhaan kun dili man padayon nang mahunong ang pagpamaligya sa mga double dead nga karne sa merkado tungod sa bug-at na nga silot niini.
Ubos niining balaod, ang unsa mang karne sa hayop nga gi-ihaw gikan sa unregistered/unaccredited meat establishment ug wala mopaubos sa inspeksyon, i-klasipika isip ‘hot meat’.
Samtang ang mga smuggled, undocumented ug unregistered nga karne ug meat products gikan sa ubang nasud, i-klasipika usab isip ‘hot meat’. (PIA-Bohol/ecb/i-gg)
