by admin | Jan 26, 2017 | Headlines, Kontra Droga, National News, Police Reports
MANILA, January 26 (PIA)–Gi-alerto sa Philippine Drug Enforcement Agency (PDEA) ang publiko batok sa mga nagtakoban nga ahente sa ahensiya.
Ang pasidaan gihimo ni PDEA Chief Isidro Lapeña atubangan sa nadawat nilang taho kalabot sa mga nagpailang PDEA agents sa ilang komunidad ug nagtanyag sa mga ‘persons of interest’ nga matangtang sa watchlist sa mga drug personalities bugti sa salapi.
Giingong pipila ka pekeng agents usab ang nangayo og ‘protection money’ gikan sa mga drug pushers.
Gitataw ni Lapeña nga matangtang lamang ang pangalan sa mga drug pusher gikan sa ilang watchlist kun mabilanggo kini.
Kalabot niini, gi-awhag sa PDEA ang publiko nga isumbong ang mga ingon niining insidente pinaagi sa pag-text sa PDEA 24/7 Hotlines: 09998887332, 09255737332 ug 09279150616 o sa pagtawag sa PDEA Hotlines: (02) 920-0735 and (02) 920-0736.
Ning bag-o lang, nabisto usab ang pagpaningil sa pipila ka mga pekeng PDEA agents sa recruitment fee sa ahensiya. (ecb/PIA7-Bohol)
by admin | Jan 26, 2017 | Headlines, National News
MANILA, January 26 (PIA)–Nagpagawas ang Bureau of Customs (BOC) og sumbaan alang sa buhis nga ipahamtang sa mga bagaheng dalhon paule sa Pilipinas sa mga balikbayan ug mamauling overseas Filipino workers (OFWs).
Nakalatid sa Customs Administrative Order (CAO) No. 06-2016, nga naglangkob sa Republic Act No. 10863 o ang Customs Modernization and Tariff Act sa conditionally tax and/or duty-exempt importation sa mga personal ug household effects sa mga mobalik nga mga Pilipino gikan sa ubang nasod.
Enero 9 sa dihang gipagawas ang CAO sa Official Gazette nga nahimong epektibo human milabay ang 15 ka adlaw o niadtong Enero 24.
Gipasabot sa BOC nga ang mga “returning resident” usa ka Filipino national, apil ang asawa ug mga anak nga nagpuyo og unom ka buwan sa ubang nasod ug pabalik na sa Pilipinas.
Samtang ang mga ‘retur¬ning OFWs’ kadtong adunay gikoptan nga valid passport nga gipagawas sa Department of Foreign Affairs (DFA) ug gi-sertipikahan sa Department of Labor and Employment (DOLE) o sa Philippine Overseas Employment Administration (POEA) alang sa mga overseas employment purposes.
Giingong mahimong isulod usab ang pipila ka household appliances, machi¬nery o sports equipment sa ilang mga bagahe. (ecb/PIA7-Bohol)
by admin | Jan 25, 2017 | Major Events, National News
MANILA, January 25 (PIA)–Sa pagsulod ning buwan sa Enero, gi-anunsiyo sa Social Security System (SSS) nga magpatuman sila sa operation “tokhang” isip usa ka paagi sa pagpangolekta.
Matud pa ni SSS Chairman Dean Amado D. Valdez, kini isip pasidaan sa mga employer nga walay bisan kinsa ang mas gamhanan sa balaod ug dili mosugot ang ilang buhatan sa padayong wala pagtagad sa social security protection sa mga miyembro.
Giingong gamiton sa SSS ang kusog sa balaod aron pangitaon ang mga delingkwenteng employers nga adunay nakasang-at nga kaso batok kanila tungod kay kinahanglan nilang manubag sa wala pag-report sa ilang mga empleyado, wala pagpagawas sa mga dokumento, wala pagbayad sa premium ug wala pag-remit sa mga bayad sa utang sa SSS sa ilang mga empleyado.
Ubos niining mekanismo, magpagawas og show cause order ang SSS sa mga delingkwenteng employers aron hatagan sila og kahigayonan nga mosunod sa SSS Act.
Kun dili gani mosunod, pasakaan sila og kaso.
Gidugang usab ni Valdez nga ipagawas nila sa media ang mga pangalan sa mga nag-unang delingkwenteng employers. (ecb/PIA7-Bohol)
by admin | Jan 25, 2017 | Headlines, National News
MANILA, January 25 (PIA)–Hingosgan pa sa Bureau of Internal Revenue (BIR) ang ilang paggukod sa mga wala nagbayad og saktong buhis.
Matud pa ni BIR Commissioner Caesar Dulay, hingosgan pa sa ilang buhatan ang Oplan kandado, E-Payment ug E-Filing Programs.
Sa katapusang parte sa 2016, nilambo pa ang tax collections sa BIR.
Matud pa ni Dulay, nikabat sa 5.05 porsiyento ang nakolektang buhis niadtong Disyembre 2016.
Target sa buhatan karong tuig 2017 nga makab-ot ang P1.8 trilyong tax collections. (ecb/PIA7-Bohol)
by admin | Jan 25, 2017 | Headlines, Malakanyang Updates, National News
MANILA, January 25 (PIA)–Gipahayag ni Presidente Rodrigo Duterte nga bukas siya nga pasidunggan og Medal of Valor ang tanang 44 ka Special Action Force (SAF) commandos nga napatay sa Mamasapano encounter batok sa teroristang si Zulkipli Binhir alias Marwan sa Mamasapano Maguindanao, duha ka tuig na ang milabay.
Atol sa pakighinabi sa mga miyembro sa pamilya sa SAF44 kagahapon sa Malakanyang, gimanduan ni Duterte si Philippine National Police (PNP) Chief Director General Ronald dela Rosa nga tun-an ang posibleng paghatag og Medal of Valor sa tanang miyembro sa SAF 44.
Hangtud sa katapusan lamang ning Enero ang gihatag kang Dela Rosa tungod kay may mga record naman sa imbestigasyon ang Kamara ug ang Senado nga mahimong basehan sa iyang mahimong desisyon.
Ang paghatag og Medal of Valor sa 42 pa ka miyembro sa SAF 44 gihangyo sa ilang pamilya sa dihang niatubang kini kang Presidente Duterte sa Malakanyang.
Kahinumdoman nga sila Chief Inspector Gednat Tabdi ug PO2 Romeo Cempron lamang ang nahatagan og Medal of Valor ubos sa administrasyong Aquino samtang Medalya ng Kabayanihan ang gihatag sa nahabiling 42 ka miyembro sa SAF.
Gibutyag usab ni Presidente Duterte nga magtukod usab siya og usa ka independent commission nga mag imbestiga sa pagkamatay sa SAF 44 diin hangyuon niya ang mga retiradong justices sa Supreme Court ug pipila ka sibilyan nga dili niya kaila nga mahimong miyembro sa komisyon.
Karong adlawa, Enero 25 gihandom ang ikaduhang tuig nga anibersaryo sa Mamasapano encounter. (ecb/PIA7-Bohol)
by admin | Jan 23, 2017 | Headlines, National News
MANILA, January 23 (PIA)–Milagda ang gobyerno sa Pilipinas ug National Democratic Front of the Philippines (NDFP) og usa ka supplemental guidelines alang sa operasyon sa joint monitoring committee (JMC) ubos sa Comprehensive Agreement for the Respect of Human Rights and International Humanitarian Laws (CARHRHIL).
Pinaagi sa full operation sa JMC, ma-imbestigahan na ang mga natahong pagpanglapas sa tawhanong katungod sa pwersa sa gobyerno o bisan sa pwersa sa komunistang grupo sa usa ka independent body nga gilangkoban sa mga tinugyana sa gobyerno ug NDFP.
Ang maong supplemental guidelines nga nakabase sa JMC framework nga nasabotan niadtong tuig 1998 gilagdaan sa ikatulong round sa peace negotiations tali sa gobyerno sa Pilipinas ug NDFP sa Holiday Inn Rome – Eur Parco de Medicin sa Italy.
Matud pa ni Department of Labor and Employment (DOLE) Kalihim Silvestre Bello III, sa pagsilbing peace panel chairman sa gobyerno sa Pilipinas, mahimong dali na lang ang full operation sa JMC kauban ang maong supplemental guidelines ubos sa atong legal regime nga maoy nagpasiugda sa tawhanong katungod ug international humanitarian laws, sama sa balaod batok sa enforced disappearance, anti-torture act, international humanitarian laws, Human Security Act, writ of amparo, writ of kalikasan ug uban pa.
Miingon usab si NDFP peace panel chairman Fidel Agcaoili nga ang maong paglagda sa duha ka panig nagpakita lamang og pasalig sa Duterte administration sa pagmugna og usa ka peace agreement sa maong walhong grupo. (ecb/PIA7-Bohol)
