by admin | Sep 5, 2016 | Headlines, Major Events, National News
MANILA, September 5 (PIA)–Gipagawas sa Malakanyang ning bag-o lang ang duha ka bersyon sa anti-drug advertisement niini.
Matud pa ni Presidential Communications Office (PCO) Kalihim Martin Andanar, tuyo sa maong advertisement nga makuha ang atensyon sa matag pamilyang Pilipino aron makalikay sa paggamit sa ilegal nga droga.
May duha ka bersyon ang advertisement, ang una kalabot sa usa ka amahan nga nagumon sa ginadili nga droga diin gipakita ang daghang mahinungdanong kahigayonan nga wala niya nakauban ang iyang pamilya.
Samtang ang ikaduha nga bersyon usab kalabot sa usa ka inahang Overseas Filipino Worker (OFW) nga perting paningkamot og trabaho sa ubang nasod, samtang ang iyang anak sa Pilipinas tiggamitan sa ilegal nga droga.
Kapin sa duha ka minuto ang full version sa duha ka advertisements ug si Brillante Mendoza ang director niini.
Ang maong mga TV ads makita sa mga TV stations ug mga sinehan sa tibuok nasod. (ecb/PIA7-Bohol)
by admin | Sep 5, 2016 | Headlines, National News
MANILA, September 5 (PIA)–Human ang duguong pagpamomba sa syudad sa Davao, gitambagan sa Malakanyang ang mga Pilipino nga dili mahadlok, apan magpabiling alerto o magbinantayon.
Matud pa ni Presidential Communications Office (PCO) Kalihim Martin Andanar, angay lang nga ipadayon sa publiko ang ilang kinabuhi samtang motabang sa otoridad pinaagi sa pagsumbong sa mga kadudahang aktibidad o kalihokan.
Si Andanar nagkanayon nga karong walay dagway ang kaaway, ang pinakamaayong himuon mao ang magkahiusa ang gobyerno ug katawhan.
Matud pa nga ang gubat sa mga terorista, gubat usab sa tibuok nasod.
Dugang pa sa kalihim, ang mga terorismo nahitabo sa mga wala damha nga higayon mao nga kinahanglang mag-amping gayud.
Sa dihang gipangutana si Andanar kun may kalabotan ba ang pagpamomba sa Davao sa kampanya ni Presidente Rodrigo Duterte batok sa iligal nga droga, miingon kini nga dili ikalimod nga may mga nakaaway nga drug lords ang Presidente nga may igong pondo.
Apan bisan kanunay nga mauban ang mga drug lords sa mga gidudahang suspek, ning higayona, nagtuo si Presidente Duterte nga mas daku ang posibilidad nga terorista gayud ang nagpaluyo niini. (ecb/PIA7-Bohol)
by admin | Sep 2, 2016 | Headlines, National News
MANILA, September 2 (PIA)–Nipagawas og abiso ang Department of Foreign Affairs (DFA) sa tanang Pinoy nga namuyo ug nanuroy sa Singapore sa paglikay una sa mga lugar nga dugokonon sa katawhan aron makalikay nga matakdan sa makamatay nga Zika virus.
Matud pa ni DFA Assistant Secretary Charles Jose, angay seryosohon sa tanang Filipino nga naa sa Singapore ang pasidaan human na usab sa kumpirmadong 41 ka locally transmitted Zika virus infection ang natala partikular na sa Aljunied Crescent ug Sims Drive area.
Dungan niini, gipalihok na sa DFA ang tanang embassy personnel sa maong nasod nga magpagawas dayon og advisory sa Filipino community nga mag-amping sa maong virus.
Matud pa nga kun mag-positibo sa Zika virus, ipahibalo kini dayon sa Philippine Embassy pinaagi sa numero 6737-3977 o 9072-2797 aron matabangan dayon sa embahada. (ecb/PIA7-Bohol)
by admin | Sep 1, 2016 | Headlines, Major Events, National News
MANILA, September 1 (PIA)–Gisugat ni Presidente Rodrigo Duterte sa Ninoy Aquino International Airport (NAIA) Terminal 2 kagahapon ang mga overseas Filipino workers (OFW) nga na-repatriate gikan sa Saudi Arabia human sila nawad-on og mga trabaho.
Nasulod na usab karon sa Pantawid Pamilyang Pilipino Program o 4Ps ang maong 128 ka OFWs nga nawad-an og trabaho sa al Khobar Saudi Arabia.
Matud pa sa Presidente, kini aron makalabang ang mga OFWs sa pang adlaw-adlaw nila nga panginabuhi.
Ubos sa 4Ps, makadawat og pinansyal nga ayuda ang pamilyang benepisyaryo depende na usab sa gidaghanon sa mga anak nga nagtungha gikan elementarya hangtud high school.
Gawas sa 4Ps, gihatagan usab ni Presidente Duterte ang mga OFWs nga nawad-an og trabaho og tag-P5,000 ug gi-angkon na usab niini ang pagpatungha sa ilang mga anak.
Gihangyo usab sa Presidente ang mga gipapauling OFWs sa dili pagsulod sa ilegal nga buhat sama sa droga kay matud pa niini, gub-on lang sa droga ang ilang kinabuhi ug mahimo pa kining ikamatay nila sama sa ubang drug suspek nga gipatay sa kauban lang usab nila sa negosyo sa ilegal nga droga. (ecb/PIA7-Bohol)
by admin | Aug 30, 2016 | Headlines, Major Events, National News
MANILA, August 30 (PIA)–Gibuksan na sa Philippine National Police (PNP) ang ilang text hotline alang sa mga mohatag og impormasyon kalabot sa mga giingong “ninja cops” kun polis nga tig-recycle og mga droga ug protetor sa mga sindikato sa ilegal nga droga.
Matud pa sa tigpamaba sa PNP nga si S/Supt. Dionardo Carlos, 24/7 nga bukas o 24-oras matag aldaw sulod sa usa ka semana ang ilang PNP text hotline 09178475757 aron modawat ug mo-proseso sa mga confidential information gikan sa publiko.
Giseguro sa PNP nga ang tanang ihatag nga impormasyon ilang e-konsiderar nga “confidential” ug ipaubos sa makuting validation procedures.
Sa iyang mensahe atol sa pagtimaan sa National Heroes Day kagahapon sa Libingan ng mga Bayani, gipahibalo ni Presidente Rodrigo Duterte ang paghatag og P2 milyong reward matag ulo sa makahatag og kasayuran sa mga gitawag nga “ninja cops” isip parte sa kampanya sa gobyerno aron padayon nang maguba ang apparatus sa ilegal nga droga sa nasod.
Dungan niini, gi-awhag sa PNP ang publiko nga suportahan ang ilang kampanya aron padayon nang mahinlo ang PNP sa mga anomaluso ug nalambigit sa ilegal nga droga. (ecb/PIA7-Bohol)
by admin | Aug 30, 2016 | Headlines, Major Events, National News
MANILA, August 30 (PIA)–Gitudlo ni Presidente Rodrigo Duterte si Chief Protocol Officer Marciano Paynor, Jr. isip bag-ong ambassador sa Pilipinas sa Amerika.
Alisdan ni Paynor si Philippine Ambassador to US, Jose Cuisia.
Si Paynor kanhi nang nahimong ambassador sa Pilipinas sa Israel ug Cyprus.
Nahimo usab siyang protocol officer nilang kanhi Presidente Fidel Ramos ug Gloria Macapagal-Arroyo.
Si Paynor nahimong miyembro sa Philippine Military Academy (PMA) class 1971.
Samtang si Robert Borje, kanhi Second Secretary sa Permanent Mission of the Philippines to the United Nations (UN), ang mahimong bag-ong chief protocol officer ni Presidente Duterte.
(ecb/PIA7-Bohol)
