by admin | Aug 25, 2016 | Headlines, National News
MANILA, August 25 (PIA)–Nipasidaan ang Commission on Elections (Comelec) sa mga botanteng magduwa sa nisikat na karong reality based game application nga Pokemon Go sa mga voting stations sa umaabot nga Barangay ug Sanguniang Kabataan elections sa Oktubre 31.
Gipahinumdom sa Comelec sa mga kabataan nga dili lamang ang pagkuha og hulagway sa balota ang gibawal, apan apil na usab ang pagpanakop og Pokemon sulod sa mga polling precint.
Una nang gibawal ang pagduwa sa Pokemon Go sa pipila ka lugar sa nasod.
Ang mga masakpang motorista usab nga nagduwa og Pokemon Go samtang nagmaneho, pahamtangan og silot. (ecb/PIA7-Bohol)
by admin | Aug 24, 2016 | Headlines, National News
MANILA, August 24 (PIA)–Kalinaw ug kahusay sa katilingban ang mahinongdanong pundasyon sa mga polisiyang pang-ekonomiya sa Pilipinas nga mao usab ang prayoridad sa administrasyon ni Presidente Rodrigo Duterte.
Matud pa ni National Economic and Development Authority (NEDA) Director-General ug Socioeconomic Planning Kalihim Ernesto Pernia, aron makab-ot ang paglambo sa ekonomiya, kinahanglan ang kalinaw ug kahusay ug pagsumpo sa kriminalidad, ilegal nga droga, smuggling, tax evasion ug uban pang ilegal nga buhat.
Pinaagi niini, mas daghan ang madaning mamuhonan sa nasod ug mas molambo pa ang atong ekonomiya.
Apan bisan pa sa pipila ka grupo sa Pilipinas ang nisaway sa kampanya sa Presidente batok sa ilegal nga droga, gipahayag ni Pernia atol sa usa ka press conference kagahapon sa Malakanyang nga mas daghan ang giingong uyon sa pagpadagan sa kasamtangang Presidente tungod sa pagkunhod sa crime rate.
Giingong wala usab angay ikahadlok ang mga banyagang nagplanong mobisita sa nasod basta mosunod lamang sa balaod sa Pilipinas.
Samtang apil usab sa mga prayoridad sa administrasyong Duterte aron mapabiling malambuon ang ekonomiya mao ang pagsulong sa mga infrastructure projects.
Gibutyag ni Pernia nga 10 ka proyekto nga nagkantidad og P320 bilyon ang aprubado na sa investment coordination committee. (ecb/PIA7-Bohol)
by admin | Aug 22, 2016 | Headlines, National News
MANILA, August 22 (PIA)–Gilusad na sa Philippine Postal Corporation (PhlPost) ang selyo isip pagtimaan sa makasaysayanong inagurasyon ug pagpanumpa ni Presidente Rodrigo “Rody” Duterte isip ika-16 nga Presidente sa Republika sa Pilipinas sa Rizal Ceremonial Hall sa Palasyo sa Malakanyang sa Manila sa ika-12:00 sa udto niadtong Hunyo 30, 2016.
Siya ang ika-upat nga Pangulo sa Pilipinas ug labing unang Min¬danaoan nga nanumpa sa Palasyo sa Malakanyang.
Parte na sa tradis¬yon sa PhlPost ang pagpagawas og “inaugural stamps” sa mga nanumpang Presidente sa Pilipinas diin gikonsiderar ang selyo isip tig-tala sa mga mahinungdanong panghitabo sa kasaysayan ug kultura sa nasod.
Makita sa maong “inaugural stamps” ang larawan ni Presidente Duterte nga nanumpa sa atubangan ni Supreme Court Associate Justice Bienvenido Reyes kauban ang iyang kamanghorang anak kang Honeylet Avanceña nga si Veronica, dala ang kopya sa Bibliya nga hinatag sa iyang mipanaw na nga inahang si Soledad. Kauban usab sa larawan ang iyang mga anak nga sila Sara, Paolo ug Sebastian.
Nagpagawas ang PhlPost og 150,000 kabuok sa maong selyo ug mapalit na karon sa mga buhatan sa PhlPost sa tibuok nasod sa kantidad nga P17.00.
Kauban usab nga gipagawas sa buhatan ang espesyal nga souvenir sheet nga limitado lamang sa 10,000 ka kopya nga nagkantidad og P55 matag usa ug may gidak-on nga 10 cm x 4.5 cm. (ecb/PIA7-Bohol)
by admin | Aug 22, 2016 | Headlines, National News
MANILA, August 22 (PIA)–Gibuksan sa Commission on Elections (Comelec) ang ilang cybersecurity hotline nga tuyong tabangan ang mga botanteng posibleng naapektuhan sa ‘massive data breach’ o pagka-hack sa website sa poll body niadtong Marso.
Ang maong hotline gibuksan ubos sa Voter Care Center, aron matabangan sa Information Technology Department (ITD) ug sa Education and Information Division (EID) sa Comelec ang mga botanteng apektado sa online security breach ug identity theft.
Mahimong motawag sa (02) 525-9301 gikan alas 8 sa buntag taman alas 5 sa hapon, Lunes hangtud sa Sabado ang bisan kinsang intresado.
Kinahanglan lamang ihatag sa mga caller ang ilang pa¬ngalan, petsa sa adlaw nga natawhan, address, contact number ug e-mail address.
Giingong mahimo usab ipadala ang reklamo sa usa ka botante pinaagi sa pagpadala og email sa votercarecenter@gmail.com. (ecb/PIA7-Bohol)
by admin | Aug 22, 2016 | Headlines, National News
MANILA, August 22 (PIA)–Human gipakanaog sa puwesto ni Presidente Rodrigo Duterte ang mga presidential appointee epektibo karong adlawa, giseguro sa Malakanyang nga dili makumpromiso ang serbisyo sa publiko sa mga hingtungdang regulatory agencies.
Pasabot pa ni Presidential Communications Office (PCO) Kalihim Martin Andanar, lig-on man ang burokrasya sa nasod nga iyang mapadagan ang gobyerno bisan kasamtangang wala’y pangulo sa ilang ahensya.
Dugang pa ni Andanar, sa pagkawala sa mga appointees sugod karong adlawa, giingong wala sila’y nakitang problema tungod kay may mga deputy man ug career officers ang mga ahensiya nga mahimong mopadagan sa trabaho sa mga buhatan sa gobyerno.
Una niini, nidesider ang Presidente nga himuong bakante ang liboan ka presidential appointee positions sugod karong adlawa tungod sa pagkatap gihapon sa korupsyon sa gobyerno.
Partikular nga gipuntirya ni Presidente Duterte ang korapsiyon sa Land Transportation Office (LTO) ug Land Transportation Franchising and Regulatory Board (LTFRB).
Una nang miingon si Andanar nga karong adlawa gitakdang magpagawas og memorandum ang Malakanyang nga magdetalye sa maong kamanduan ni Presidente Duterte. (ecb/PIA7-Bohol)
by admin | Aug 19, 2016 | Headlines, Major Events, National News
MANILA, August 19 (PIA)–Nilambo pa ang ekonomiya sa Pilipinas og 7 porsiyento sa ikaduhang kwarter sa tuig 2016.
Kini na ang pinakapaspas nga paglambo nga natala sulod sa kapin duha ka tuig matud pa sa Philippine Statistics Authority (PSA).
Matud pa ni National Economic and Development Authority(NEDA) Director General Ernesto Pernia, ang 7% growth rate sa gross domestic product (GDP) sa nasod alang sa ikaduhang kwarter maayong pagsugod alang sa administrasyon ni Presidente Rodrigo Duterte.
Giingong nahisulod usab kini sa target nga 6 ngadto sa 7 percent growth rate sa gobyerno karong tuig.
Matud pa ni Pernia, daku ang natampo sa lig-on nga ekonomiya nga gibilin sa niaging administrasyon.
Apan taliwala niini, giangkon ni Pernia nga magsilbing hagit pa gihapon sa administrasyon ang taas nga poverty rate.
Target sa economic managers ni Presidente Duterte nga gikan sa kasamtangang 25%, mapaubos ngadto sa 16% na lamang ang poverty incidence sa tuig 2022. (ecb/PIA7-Bohol)
