by admin | Jun 20, 2016 | Headlines, National News
MANILA, June 20 (PIA)–Nipasidaan ang Philippine Overseas Employment Administration (POEA) sa publiko nga dili dayon motuo sa mga gitanyag nga trabaho sa laing nasod nga makita sa mga social media nga gipadala pinaagi sa mga email.
Nipagawas ang buhatan sa maong pasidaan tungod sa pagdagsang karon sa mga pekeng job offers nga migawas sa Twitter ug Facebook.
Matud pa ni POEA Administrator Alfredo Cacdac, angay unang moberepikar kanila ang bisan kinsang interesadong mo-trabaho sa ubang nasod.
Kini aron masiguro nga lehitimo ang mga abiso ug dili mailad sa mga sindikato.
Giingong kasagaran sa mga pekeng job offer ang gipaagi lamang sa internet ang transaksyon ug ipa-deposito sa money remittance center ang bayad. (ecb/PIA7-Bohol)
by admin | Jun 17, 2016 | Headlines, National News
MANILA, June 17 (PIA)–Gi-uswag pa sa Commission on Elections (Comelec) taman Hunyo 30 ang pagsumiter sa Statement of Contributions and Expenditures (SOCE) sa mga kandidatong midagan sa milabay nga piniliay.
Sa boto nga 4-3, gihatagan og pagtagad sa Comelec en banc ang hangyo sa Liberal Party nga e-extend ang deadline sa pagsumiter sa SOCE.
Apil sa mga nibotar sa pag-uswag sa deadline sila commissioners Arthur Lim, Al Parreño, Sheriff Abas, ug Rowena Guanzon.
Kini bisan pa sa rekomendasyon ni Campaign Finance Office commissioner-in-charge Christian Robert Lim nga dili angay hatagan og higayon ang hangyo sa LP tungod kay dili kini patas alang sa ubang kandidato ug partido nga misunod sa gitakdang deadline.
Kahinumdoman nga niadtong Martes lang naka-sumiter og SOCE ang Liberal Party, unom ka adlaw human sa orihinal nga gitakdang deadline nga Hunyo 8.
Sa tanang mga kandidato sa pagka-presidente, si LP standard bearer Mar Roxas lamang ang wala pa naka-sumiter og SOCE.
Matud pa sa kampo ni Roxas, bulto-bulto ang mga resibo nga kinahanglang ma-scan ug angay ibutang sa mga dokumento maong pakyas sila sa paggukod sa deadline nga gitakda sa Comelec.
Samtang midepensa ang tigpamaba sa Comelec nga si Director James Jimenez diin miingon kini nga dili lamang ang LP ang makapahimos sa maong lakang sa komisyon tungod kay daghan pa gihapong mga senador, kongresista ug uban pa ang wala pa gihapon nakaduso sa ilang SOCE.
Matud pa nga kun dili makalingkod ang mga nidaog, masasayang lang ang mga boto sa katawhan. (ecb/PIA7-Bohol)
by admin | Jun 17, 2016 | Headlines, National News
MANILA, June 17 (PIA)–Ipaubos sa Department of Interior and Local Government (DILG) sa basic orientation training program ang kinatibuk-ang 559 ka mga bag-ong gobernador, city ug municipal mayors sa tibuok nasod nga napili sa milabay nga eleksyon.
Matud pa ni DILG Kalihim Mel Senen Sarmiento nga ang ‘Basic Orientation: The First 100 Days,’ usa ka parte sa dugay nang Newly-elected Officials (NEO) nga programa sa DILG pinaagi sa ilang training arm nga Local Government Academy (LGA) alang sa mga bag-ong napili nga mga opisyal sa nasod.
Kining himuon nga pagbansay-bansay ipahigayon karong buwan sa Hunyo ug Hulyo 2016 isip pagtubag sa departamento sa panginahanglan sa mga bag-ong lokal nga mga lider isip ilang giya sa pagsugod sa ilang pagdumala.
Gipaabot usab sa DILG nga makumpleto sa mga bag-ong opisyal ang unang 100 days Calendar ug ang ilang development commitment agenda.
Lakip sa mga topic nga hisgotan mao ang governance and decentralization, Duties Responsibilities and Accountabilities of elected officials, strategic management, leadership, climate change and disaster management, local economic development, crisis management, and peace and order, ug uban pa. (ecb/PIA7-Bohol)
by admin | Jun 16, 2016 | Headlines, National News
MANILA, June 16 (PIA)–Subling gipahinumdoman sa Department of Labor and Employment (DOLE) ang mga Pilipinong gustong mo-trabaho sa ubang nasod sa pagpaubos sa mandatory online Pre-employment Orientation Seminar (PEOS Online) nga pangayuon sa Philippine Overseas Employment Administration (POEA).
Mahinungdanon nga mosunod niini ang mga overseas Filipino workers (OFWs) aron walay mahimong problema sa paggawas nila paingon sa ubang nasod.
“I enjoin all Filipino overseas work applicants to adhere to its mandatory PEOS Online policy issued by the POEA which took effect this month,” matud pa ni DOLE Kalihim Rosalinda Dimapilis Baldoz.
Gawas niini, magamit usab sa mga nangita or trabaho sa ubang nasod ang PEOS online aron matabangan nga makadesisyon kun ipadayon pa niini ang pagtrabaho sa ubang nasod o magpabilin na lamang sa nasod.
Gipasabot ni Baldoz nga gi-disenyo ang online PEOS aron batokan ang illegal recruitment ug human trafficking.
Ubos sa Memorandum Circular No. 2, Series of 2016 nga gipagawas sa POEA, gi-obligar ang tanang Filipinos nga gustong mo-trabaho sa ubang nasod sa unang higayon nga mopa-ubos ug kumpletohon ang PEOS Online seminar. (ecb/PIA7-Bohol)
by admin | Jun 14, 2016 | Headlines, National News
MANILA, June 14 (PIA)–Gilusad kagahapon sa Philippine Atmospheric, Geophysical and Astronomical Services Administration (PAGASA) ang ilang weather forecasting application alang sa mga android user.
Makita sa maong app ang light version sa website sa PAGASA diin makakuha og impormasyon kalabot sa kahimtang sa panahon ug flood warnings.
Ang maong app mag-display sa weather information nga pinakaduol sa nahimutangan sa android user, magpindot sa notification warnings, ug magpakita og map visualizations sa nagkalain-laing weather phenomena.
Kining maong weather app naka-integrate usab sa social networking sites sama sa Facebook ug Twitter.
Samtang ang PAGASA nakig-alayon usab sa United States Agency for International Development (USAID) Be Secure Project alang sa pagmugna og simplikadong information materials kalabot sa panghitabo sa panahon.
Inapilan sa mascot nga gitawag nga “Ella the Umbrella”, ang Payong Pagasa motuki sa nagkalain-laing konsepto sama sa El Niño, La Niña ug Tropical Warning Systems sa serye sa information materials. (ecb/PIA7-Bohol)
by admin | Jun 13, 2016 | Headlines, Major Events, National News
MANILA, June 13 (PIA)–Gi-awhag ni Department of Interior and Local Government (DILG) Kalihim Mel Senen Sarmiento ang tanang local government units sa tibuok nasod nga makighiusa sa ipahigayon nga ikaduhang Nationwide Simultaneous Earthquake Drill (NSED) sa umaabot Hunyo 22.
Matud pa ni Sarmiento, mahinungdanon ang ikaduhang earthquake drill aron ipahinumdom sa publiko ang kamahinungdanon sa pag-amping ilabi na sa panahon sa kalamidad sama sa linog.
Kahinumdoman nga niadtong niaging tuig, gipahigayon ang labing unang nationwide earthquake drill diin gipakita ang nagkalain-laing eksena sa oras nga moigo ang kusog nga linog, apil na usab ang gihimong pagresponde.
Gitumbok pa sa Kalihim nga ang yawi alang sa usa ka epektibong pagpakatap sa impormasyon kalabot sa linog mao ang hapsay ug sistematikong pakighiusa sa tanan.
Dungan niini, nanawagan si Sarmiento sa tanang lokal nga kagamhanan sa tibuok nasod sa pagpahigayon usab og ilang aktibidad sa Miyerkoles, Hunyo 22 isip pagpakita sa kaandam sa publiko sa panahon sa kalamidad. (ecb/PIA7-Bohol)
