by admin | Feb 18, 2016 | National News
MANILA, Feb. 18 (PIA)–Gi-alerto na sa Civil Aviation Authority of the Philippines (CAAP) ang tanang tugpahanan sa nasud tungod sa Zika virus.
Base sa gipagawas nga memorandum sa CAAP, gimanduan ang airlines, airport authorities ug airport medical personnel nga himuon ang tanang precautionary measures aron mapugngan ang pagsulod sa maong sakit sa nasud.
Apil na niini ang pag-disinfect sa mga airline company sa mga eroplano aron mamatay ang mga lamok nga naa sa sulod niini.
Gi-alerto usab og apil sa CAAP ang Bureau of Quarantine, diin gimando niini ang pag-quarantine dayon sa mga pasaherong nakitaan og sintomas sa Zika virus.
Gitambagan usab sa CAAP ang mga tigbiyahean nga magbinantayon batok sa paak sa lamok aron malikayan nga mahimong carrier sa virus. (ecb/PIA7-Bohol)
by admin | Feb 16, 2016 | National News
BOHOL, Feb. 16 (PIA)–Nabutang sa ika-4 nga pwesto ang Pilipinas sa mga nasud nga kanunay maigo og kalamidad.
Kini base sa 2015 report sa United Nations Office for Disaster Risk Reduction (UNISDR).
Matud pa sa maong report, gikonsiderar nga ‘most disaster-prone country’ ang China nga nakasinati og 26 ka kalamidad, ikaduha ang Estados Unidos nga adunay 22 ug ikatulo ang India nga may 19.
Samtang ang Pilipinas nahimutang sa ika-upat nga pwesto nga nakatala og 15 ka kalamidad samtang ikalima usab ang Indonesia nga may 11.
Migawas usab sa maong report sa UNISDR nga ang pagbaha ang nagdala og pinakadakong kadaot niadtong 2015 nga niresulta sa pagkamatay sa 3,310 ka tawo ug 27.5 milyon ang naapektuhan.
Ang Pilipinas ug UNISDR mipadayag sa ilang pasalig sa pagpadayon sa ilang kasabotan sa pagpabilin sa momentum sa implementasyon sa Sendai Framework for Disaster Risk Reduction 2015-2030. (ecb/PIA7-Bohol)
by admin | Feb 16, 2016 | National News
MANILA, Feb. 16 (PIA)–Gisugdan na kagahapon sa National Printing Office (NPO) ang pag-imprenta sa mga balota nga gamiton sa piniliay sa Mayo 9, 2016.
Masaligon si Commission on Elections (Comelec) Chairman Andres Bautista nga mahuman ang pag-imprenta sa kapin 56.7 milyong balota hangtud sa Abril 25 nga gitakdang deadline.
Gibutyag ni Bautista nga mas mubo ang gamitong balota karong tuiga kun itandi sa gigamit niadtong 2010 ug 2013 mao nga mas paspas na kining i-imprenta.
Gikan sa kaniadtong may gilapdon nga 8.5 pulgadas ug gitas-ong 29 pulgadas, gihimo na kining 8.5 x 19 pulgadas karon.
Matud pa nga may tulo ka klaseng balota ang gamiton. Gawas sa unang nahisgotan, may 8.5 x 15.1 pulgadas alang sa mga overseas Filipino workers ug 8.5 x 24 pulgadas usab alang sa mga botante sa Mindanao.
Gipasabot ni Bautista nga taas ang gamitong balota sa Mindanao tungod kay tag-as ang mga pangalan sa mga kandidato didto ug adunay mga Arabic characters.
Matud pa nga gi-alisdan usab ang gigamit nga font sa balota karon aron mas mabasa ang pangalan sa mga kandidato kun itandi sa mga milabay nga eleksyon.
Naa sa 56,772,230 ka balota ang gamiton sa automated polls, apil ang 54,363,844 kabuok sa matag rehistradong botante sa nasud, 1,189,350 kabuok alang sa overseas absentee voters ug balota alang sa mock elections.
Samtang mokabat usab sa 223,611 ka balota ang i-imprenta sa manual elections alang sa local absentee voting.
Ang NPO 24 oras matag semana ang operasyon aron masegurong mahuman ang pag-imprenta hangtud sa gitakdang deadline. (ecb/PIA7-Bohol)
by admin | Feb 16, 2016 | National News
MANILA, Feb. 16 (PIA)–Milagda og kasabotan sila Department of Labor and Employment (DOLE) Kalihim Rosalinda Dimapilis-Baldoz ug Chief Executive Officer Washington Fabricio Ponce Garcia sa Coca Cola FEMSA Philippines, Inc. alang sa dungan nga pagmugna og mga bag-ong programa nga maghatag og trabaho, dugang panginabuhian ug technical nga pagbansay ug pag-negosyo alang sa mga mamauling overseas Filipino worker (OFW).
Sa gipahigayong pagladga sa maong kasabotan ning bag-o lang, gipasabot ni Baldoz nga gipakita sa maong kasabotan ang kamahinungdanon sa pakigtinabangay sa pribadong sektor.
Matud pa nga maghatag kini og positibong resulta sa paghikyad og mga programa ug serbisyo alang sa mga mamauling OFWs nga gustong makatrabaho sa atong nasud o makatukod og kaugalingong panginabuhian o mapun-an ang ilang kahibalo ug katakos pinaagi sa teknikal nga pagbansay.
Ang Coca Cola FEMSA usa sa pinakadakung employer sa Pilipinas, ang nag-una sa industriya sa mga ilimnon sa tibuok nasud ug adunay gipatuman nga programang trabaho ug panginabuhian sa pagkakaron.
Sa parte sa DOLE nga may gipatuman usab nga serbisyo ug programang trabaho ug panginabuhian, miingon si Baldoz nga mahinungdanon sa mga OFW ang igo ug makabulohang oportunidad alang sa posibleng trabaho ug tabang-pangkinabuhian aron madasig ang mga OFW nga magpabalin na lamang sa atong nasud.
Human matino ang mga programang trabaho ug panginabuhian, ipasulod kini sa DOLE sa programang Assist W.E.L.L. – usa ka hiniusang programa alang sa mga OFWs nga motabang sa ilang panginahanglang trabaho, panginabuhian ug tabang-legal. Ang programang Assist W.E.L.L. nga gitukod ni Baldoz kaniadto, may 18 na ka Assist W.E.L.L. Processing Centers karon sa tibuok nasud.
Ubos sa kasabotan, sigon sa gitugot sa balaod ug sa ilang mando ug patakaran, ang DOLE ug Coca-Cola FEMSA magbinayloay og impormasyon kalabot sa nagkadaiyang programang trabaho ug panginabuhian nga mahimong hiusahon. Hatagan usab nila ang matag usa kun gikinahanglan og mga datos, mekanismo, estatistika ug kasayoran kalabot sa kahibalo ug katakos sa OFW. (ecb/PIA7-Bohol)
by admin | Feb 15, 2016 | National News
MANILA, Feb. 15 (PIA)–Ipahigayon ugma, Pebrero 16 hangtud 17 ang Association of Southeast Asian Nations (ASEAN) leaders meeting sa Los Angeles California sa Estados Unidos.
Nakasentro sa maritime security ang top agenda sa ASEAN leaders meeting kauban si U.S. President Barack Obama nga tambungan usab ni Presidente Benigno ‘Noynoy’ Aquino III.
Matud pa ni Presidential Communications Operations Office (PCOO) Kalihim Herminio Coloma Jr., seguradong hisgotan ni Obama ang mga isyung may kalabotan sa maritime security partikular na ang tensyon sa gi-agawang teritoryo sa West Philippine Sea.
Gidugang pa sa Kalihim nga gipaabot nga hisgotan usab sa maong ASEAN leaders meeting ang hisgotanang pang-ekonomiya, nga kun unsa ang mahimong tabang sa Estados Unidos sa pagpalig-on sa ASEAN economic integration.
Dungan niini, giseguro ni Coloma ang pagsunod sa Pilipinas sa sumbanan nga nahisulod sa United Nations Convention on the Law of the Sea (UNCLOS) ug international law, bisan ang pagduso sa pagpalig-on sa Code of Conduct in the South China Sea.
Samtang human ang pakigpulong, atubangon ni PNoy ang mga miyembro sa Filipino community ug mga negosyante sa Los Angeles.
Moadto usab si PNoy sa Loyola Marymount Universtiy aron personal nga dawaton ang honorary degree. (ecb/PIA7-Bohol)
by admin | Feb 15, 2016 | National News
MANILA, Feb. 15 (PIA)–Gitambagan sa Department of Health (DOH) ang mga kababayen-an nga e-dilatar una ang ilang pagbuntis, taliwala sa pagkatap sa Zika virus sa parte sa Latin America.
Matud pa ni DOH Kalihim Janet Garin, mas maayo kun sa 2017 na lamang mag-planong magka-anak ang mga magtiayon aron malikayan ang Zika virus nga maka-apekto sa masuso.
Ang Zika virus nga gikan sa pinaakan sa lamok, makaingon og birth defects sama sa gamay nga ulo sa masuso nga mahimong adunay epekto sa development sa bata.
Ang mga sintomas sa Zika mao ang taas nga hilanat, paghina sa kaunoran, libagha ug conjunctivitis.
Kalabot niini, gitambagan ni Garin ang publiko nga likayan una ang pagbisita sa mga nasud nga adunay mga kaso sa Zika.
Samtang giseguro usab sa Kalihim nga padayon ang pagtuon sa DOH sa Zika virus ug kun unsa man ang mga posibleng paagi aron mapugngan ang pagsulod niini sa Pilipinas.
Gisugdan na karon sa DOH ang pagbansay sa pila ka tambalanan kun unsaon pag-detect sa Zika cases, gamit ang mga bag-ong testing kits.
Apil sa mga tambalanan mao ang Research Institute for Tropical Medicine (RITM), Baguio General Hospital, Mindanao Medical Center, Vicente Sotto Hospital, San Lazaro Hospital ug Lung Center of the Philippines. (ecb/PIA7-Bohol)
