TAGBILARAN CITY, Bohol, April 19 (PIA)–Giingong mihina ang pag-angkon sa China sa gi-ilogang teritoryo sa Scarborough Shoal, human gibasura niini ang pagpa-ubos sa arbitration process.
Sa pahayag ni Department of Foreign Affairs (DFA) spokesman Raul Hernandez, gitumbok sa opisyal nga pinaagi lamang sa International Tribunal on the Law of the Sea (ITLOS) mahatagan og katin-awan kun kinsa ang adunay soberinya sa maong teritoryo.
Una niini, padayon nang gipadaplin sa China ang imbitasyon sa Pilipinas nga dalhon sa international tribunal ang pagresolbar sa nahitabong standoff sa Scarborough Shoal.
Sa usa ka pahayag, gipaabot ni Chinese embassy spokesperson Zhang Hua nga giingong mas gilauman sa China nga tinud-on sa Pilipinas ang nahiunang kasabotan nga ipaagi sa usa ka “friendly-consultation” ang isyu tali sa duha ka nasud ug dili una abrihan ang pultahan alang sa third party.
Nagtuo pa ang Chinese government nga mahimong mas komplikado ang sitwasyon kun tugotan ang pagsulod sa ITLOS sa giingong one-on-one dispute sa Scarborough Shoal ug ubang gi-ilogang teritoryo sa West Philippine Sea. (PIA-Bohol/ecb)
DOH nipasidaan sa mga sakit nga makuha tungod sa grabeng kainit
TAGBILARAN CITY, Bohol, April 19 (PIA)–Nipasidaan ang Department of Health (DOH) sa nagkalain-laing matang sa sakit nga posibleng mo-atake partikular na ang heatstroke dala sa grabeng kainit sa panahon.
Matud pa ni Dr. Lyndon Lee Suy sa Department of Health (DOH), adunay natural nga pamaagi ang lawas sa tawo nga maka-adjust sa init sa panahon apan moabot ang higayon nga dili na makaya niini ang taas nga temperatura.
Giingong heatstroke ang unang moigo tungod sa init nga panahon.
Sigun pa kang Suy, unang senyales sa heatstroke ang kakulang na og tubig sa lawas, makabati og pagka-uhaw nga kun dili madali, mahimong musangpot sa pagluya, pagkalipong o ang uban mawad-an sa panimuot nga mahimong madayonan na.
Gipasabot ni Suy nga bisan dili direktang naa sa ilawom sa init sa adlaw, mahimo pa gihapon nga mahimong biktima sa heatstroke sama na lamang sa mga naa sa sulod sa usa ka lugar nga walay maayong ventilation.
Sa mga skin diseases, daku ang posibilidad nga makakuha og bungang-adlaw ilabi na ang mga bata.
Gitambagan usab ni Suy ang mga mogawas taliwala sa init sa adlaw nga mogamit og sunblock isip proteksyon.
Maayo usab nga tagaan og pagtagad ang mga pagkaon nga daling mapan-us tungod gihapon sa grabeng kainit sa panahon sama na lamang sa mga pagkaon nga gitunuan, adunay sagol nga kamatis ug uban pa.
Base sa pasidaan sa Philippine Atmospheric, Geophysical and Astronomical Services Administration (PAGASA), padayon nga makasinati og init nga panahon ang nasud hangtud Mayo. (PIA-Bohol/ecb)