MANILA, Jan. 22 (PIA)–Tungod sa posibleng pag-oktaba sa Kongreso sa Sangguniang Kabataan o SK Elections, gipagawas karong adlawa sa Commission on Elections (Comelec) ang usa ka resolusyon alang sa kasamtangang suspensiyon sa gun ban sulod sa 15 ka adlaw alang sa maong piniliay.
Matud pa ni COMELEC Chairman Sixto Brillantes Jr., gi-suspenso una og 15 ka adlaw ang Comelec gun ban tungod kay posibleng magpalabang og resolusyon ang ubos balay balaoranan ug senado alang sa suspensiyon sa SK elections.
Giingong human sa 15 ka adlaw nga suspensiyon, mahatagan na og katin-awan kun madayon ba gyud ang SK elction karong tuiga o i-oktaba kini sa 2016.
Sugod na unta karong adlawa, Enero 22, ug molanat hangtud Marso 2 ning tuig ang election gun ban tungod sa gitakdang piniliay sa Pebrero 21.
Kahinumdoman nga gihangyo sa COMELEC ang pag-oktaba sa SK elections karong tuiga ug idungan na lamang kini sa barangay elections sa Oktubre 2016.
Gihangyo karon ni Brillantes nga tapuson una hangtud Oktubre 2016 ang Reform Bill aron maandam ang kabataan sa maong piniliay.
Giingong sayang usab ang pondong P1 bilyon alang sa SK kun matapos dayon ang termino sa molingkod nga mga opisyal sa SK sa Oktubre 2016.
Gawas niini, gi-angkon usab ni Brillantes nga kulang sila sa pagpakatap sa information campaign sa tibuok nasud nga nagdala og kalibog sa kadaghanan. (ecb/PIA7-Bohol)