TAGBILARAN CITY, Bohol, Mar. 05 (PIA)–Padayon ang pagpamadlong sa Commission on Elections (Comelec) sa mga senatorial candidates nga nakalapas sa mga patakaran sa pagbutang sa ilang mga campaign materials.
Nanguna karon sa mga nakalapas sa campaign rules sa Comelec ang pipila ka kandidato sa Team P-Noy alang sa senatorial race sa Mayo 13, 2013 midterm elections.
Matud pa ni Comelec Chairman Sixto Brillantes, pinakadaghang paglapas sa pagbutang og poster si kanhi Akbayan Rep. Risa Hontiveros nga may upat na ka notices.
Gisundan kini nilang Sen. Antonio Trillanes IV ug Bam Aquino nga may tulo ka notice of violation matag usa kanila.
Bisan ang mga miyembro sa United Nationalist Alliance (UNA), gipadalhan usab sa poll body.
Apil na niini silang Sen. Gringo Honasan ug Rep. Jack Enrile nga natumbok usab nga may mga campaign materials sa gawas sa common poster area.
Nakadawat usab og sumbong ang Comelec bahin nilang Sen. Loren Legarda ug Bro. Eddie Villanueva nga nakalapas usab sa pagbutang sa ilang mga poster. (PIA-Bohol/ecb/i-gg)