TAGBILARAN CITY, Feb. 10 (PIA)–Gisugdan na kagahapon dungan sa pormal nga pagsugod sa campaign period alang sa midagan sa nasudnong posisyon sa Commission on Elections (Comelec) dinhi ang pagpanangtang sa mga campaign materials sa mga kandidato nga gipangbutang gawas sa common posting areas.
Gibutyag ni Provincial Election Supervisor Eliseo Labaria nga ang Philippine National Police (PNP) ug Department of Public Works ang Highways (DPWH) ang nipakatap og bahan nga maoy nanangtang sa mga materyales sa mga lokal ug nasudnong kandidato nga gigamit sa pagpangampanya nga gipangbutang gawas sa common posting areas sugod kagahapon.
Kini dungan sa pormal nga pagsugod sa campaign period alang sa midagan sa nasudnong posisyon kagahapon, Peb. 9 samtang ang campaign period alang sa mga lokal nga kandidato magsugod usab sa Marso 26.
Gipahibalo sa Comelec nga sa syudad sa Tagbilaran, ang gitakdang common poster areas mao ang palibot sa mga barangay halls.
Samtang sa mga barangay sa syudad sa Tagbilaran, ang gitakdang common poster areas mao ang mosunod:
Sa Booy (naglakip sa bisinidad sa basketball court); Cogon (naglakip sa public market); Dampas (bisinidad sa health center ug basketball court); Dao (ang bakanteng lote tali sa Dao public market ug Island City Mall, basketball court ug health center).
Sa Mansasa (naglakip sa palibot sa basketball court); Poblacion II (palibot sa City Square); San Isidro (palibot sa health center ug basketball court); Taloto (ang bakanteng lote tapad sa barangay hall ug eskina sa dalan sa Talisay ug sitio Basak); Tiptip (ang lugar atbang sa barangay hall ug palibot sa basketball court); ug sa Ubujan (palibot sa basketball court). (ecb/PIA7-Bohol)