MANILA, June 09 (PIA)–Nanawagan ang Commission on Elecions (Comelec) sa publiko nga dili himuong basehan ang mga political advertisement sa pagpili sa mga ibotar sa nasudnong piniliay sa umaabot Mayo 2016.
Pebrero sa sunod tuig pa ang pormal nga pagsugod sa campaign period apan karon pa lang, nagkadaghan na ang mga political advertisement sa telebisyon.
Gipahayag sa Comelec nga dili pa kini makonsiderar nga premature campaigning mao usab nga dili mahimong i-reklamo ang mga politikong nagpaluyo niini.
Matud pa sa tigpamaba sa Comelec nga si Dir. James Jimenez, makonsiderar lamang nga premature campaigning kun ang usa ka kandidato nakaduso na sa iyang certificate of candidacy (COC) ug kun nangampanya kini bisan wala pa ang campaign period.
Sa Oktubre pa gitakda sa Comelec ang pagduso sa COC alang sa mga modagan sa 2016 elections.
Alang sa Comelec, bisan walay balaod nga nagdili sa sayong pagpangampanya, wala pa gihapon kini nahisubay sa aspketong moral ug ethical.
Pasabot pa ni Jimenez, dili patas ang ingon niining aksiyon sa mga politikong walay katakos sa paghimo sa ilang kaugalingong political advertisement nga gikonsiderar nga mahal.
“Engaging in premature campaigning unbalances the playing field,” matud pa ni Jimenez.
Taliwala sa kawalay balaod aron mapugngan ang premature campaigning, nanawagan pa gihapon sa publiko ang Comelec nga magmasusihon sa pagpili sa mga mahimong mosunod nga lider sa nasud. (ecb/PIA7-Bohol)
