TAGBILARAN CITY, Bohol, Sept. 30 (PIA)–Hugot nga gipahinumdoman sa Commission on Elections (Comelec) ang mga mokandidato sa Oktubre 28 nga barangay elections nga likayan ang sobrang paggasto sa pagpangampanya aron dili madiskuwalipika sa eleksiyon.
Nipasidaan si Comelec Chairman Sixto Brillantes Jr. nga gukdon ug patubagon gayud nila sa balaod ang mga kandidatong mapamatud-ang molapas sa gitakdang galastohan sa pagpangampanya.
Agig pagtamod sa balaod, ang usa ka kandidato mahimo lamang mogasto og P3 alang sa matag botante kun opisyal nga kandidato ug P5 usab kun independent candidate ubos sa Republic Act 7166.
Ubos usab sa Campaign Finance Law, obligado ang mga kandidato nga moduso sa ilang statement of contribution and expenditures (SOCE) diin gibutang didto nga kinahanglang dili sila molapas sa P5 per registered voter. Kun dili sila mosunod niini, ma-diskuwalipika sila.
Kahinumdoman nga una nang gi-diskuwalipika sa Comelec First Division si Laguna Gov. ER Ejercito tungod sa sobrang paggasto sa pagpangampanya niadtong Mayo. (ECB/PIA7-Bohol)
