TAGBILARAN CITY, Bohol, Feb. 12 (PIA)–GI-ALERTO sa pamunuan sa Commission on Elections (Comelec) ang tanang nilang mga election officers sa tibuok nasud dungan sa pagsugod sa 90 ka adlaw nga pagpangampanya sa mga national candidates sugod karong adlawa.
Marching order ni Brillantes sa mga opisyal sa Comelec sa mga lalawigan, angay hingpit nga tutokan ang pagpangampanya sa mga kandidato sa ilang lugar ug bantayan gayud ang mga pagpanglapas niini sa balaod.
Gitataw usab ni Brillantes nga bisan may gitakdang limitasyon sa political ads, giingong mahimong maka-avail ang usa ka kandidato og tulo ka doble gikan sa 180-120 minutes sa radyo ug telebisyon alang sa national nga kandidato ug 90-60 alang sa lokal nga kandidato.
Samtang nipasidaan usab ang Comelec sa mga kandidato nga sundon gayud og maayo ang regulasyon kalabot sa pagpamaskil og mga posters sama sa pagbutang sa tukmang common poster areas ug tangtangon na usab ang unang mga gipamaskil sa mga bawal nga lugar apil na sa mga public utility vehicles sama sa mga bus ug taxi.
Pasidaan pa sa Comelec, mahimong hinungdan sa pagkadiskwalipika sa usa ka kandidato ang dili pagsunod niini sa simpleng sumbanan sa Comelec. (PIA-Bohol/ecb/i-gg)
Mga ‘epal’ nga politiko, isumbong sa @Comelec
TAGBILARAN CITY, Bohol, Feb. 12 (PIA)–DUNGAN sa pagsugod sa campaign period karong adlawa alang sa mga kandidato sa national posts, gilusad gahapon sa Commission on Elections (Comelec) ang bag-ong ilis nilang website nga mahimong bisitahon sa publiko aron isumbong ang mga kandidatong molapas sa campaign rules.
Matud pa sa tigpamaba sa Comelec nga si Atty. James Jimenez, kun kaniadto mga social networking sites lamang ang gigamit aron magpaabot sa mga reklamo, karon giingong may web page na nga mahimong adtuon ang publiko ug kini mao ang www.mycomelec.tv.
Unang makita kun mobisita sa website sa Comelec ang pagdasig niini sa mga botante nga makighiusa sa ilang kampanya alang sa usa ka limpyo nga piniliay.
Makita usab sa maong website ang mga sumbanan o guide sa publiko ug unsa ang mga bawal sa panahon sa pagpangampanya, PCOS demo request ug unsaon pagsumbong sa mga abusadong kandidato.
Gawas sa website, gibuksan usab sa Comelec ang ofiicial Twitter account niini pinaagi sa paggamit sa hashtag nga #SumbongKo sa @comelec.
Mahimong magpadala og mga larawan sa mga kandidato nga molapas sa campaign rules sama sa mga propaganda materials nga nakabutang sa mga bawal nga lugar. (PIA-Bohol/ecb/i-gg)
