TAGBILARAN CITY, Bohol, April 22 (PIA)–Ipaubos na usab sa Civil Service Commission (CSC) sa Red Tape Test ang 770 ka buhatan sa gobyerno karong tuiga.
Gawas niini, ipaubos usab og balik ang 150 ka buhatan nga nahagbong o wala kapasar sa niaging tuig sa maong RTT.
Matud pa ni CSC Chairman Francisco Duque III, ang mga dugokon og kliyente nga mga buhatan sa gobyerno ang i-apil sa RTT.
“Sesegundahan namin ang report card survey — 599 noong nakaraang taon at 770 ngayon. Ang pinakamataong ahensya pa rin ang isasailalim sa report card survey,” pahayag ni Duque.
Bisan hagbong ang usa ka buhatan, giingong may mekanismo ang CSC aron matabangan nga mapa-ayo pa ang performance niini. Apan kun may mahagbong pa gihapon sa ipahigayong red tape test bisan sa pagtabang sa CSC, pasakaan na og kaso ang mahagbong nga buhatan.
Samtang gitataw usab ni Duque nga wala nagpasabot nga corrupt ang tibuok ahensya kun mahagbong man kini sa maong test.
Dinhi sa lalawigan sa Bohol, tulo sa lima ka nasudnong buhatan sa gobyerno ang bagsak sa gipahigayong RTT sa niaging tuig ug ang maong mga buhatan mao ang Bureau of Internal Revenue (BIR)-Revenue District Office 84, Government Service Insurance System (GSIS) ug ang Don Emilio del Valle Hospital sa Ubay nga ubos sa pagdumala sa Department of Health (DOH). (PIA-Bohol/ecb/i-gg)
Saudi, nipagawas og requirements alang sa mga undocumented OFWs
TAGBILARAN CITY, Bohol, April 22 (PIA)–Atubangan sa gihimong pagtabang sa gobyerno sa Pilipinas sa mga undocumented Pinoy nga naa sa Riyadh, nagpagawas og requirements ang nasud sa Saudi Arabia.
Sa gipagawas nga abiso sa Philippine Embassy sa Riyadh, legal man o dili, kinahanglang ma-kompleto ang tulo ka requirement usa pa makapaule sa Pilipinas.
Una sa requirement ang pagbaton og balidong Philippine passport o travel document kun walay pasaporte.
Kinahanglan usab nga balido kini sulod sa unom ka buwan.
Ikaduhang requirement ang ticket sa eroplano ug katapusan ang exit visa gikan sa Saudi Ministry of Interior (MOI). (PIA-Bohol/ecb/i-hd)