TAGBILARAN CITY, Bohol, Sept. 17 (PIA)–Gilagdaan na ni Presidente Benigno “Noynoy” Aquino III ang Cybercrime Prevention Act of 2012 nga magpahamtang og tukmang silot sa mga nalambigit sa nagkalin-laing krimen sa internet sama sa online theft, fraud ug hacking.
Ang maong balaod nga gipasiugdahan ni Sen. Edgardo Angara gilagdaan ni Presidente Aquino niadtong Setyembre 12, 2012 ubos sa Republic Act 10175.
Matud pa ni Deputy Presidential Spokesperson Abigail Valte, nahisulod sa maong balaod ang pagtukod sulod sa 30 ka adlaw sa gitawag nga Cybercrime Investigation and Coordinating Center (CICC) nga naa ubos sa administrative supervision sa Office of the President.
Sigun pa kang Valte, ang CICC pamunuan sa usa ka Executive Director gikan sa DOST, vice chairperson ang director sa NBI samtang miyembro ang chief PNP, justice secretary ug tinugyanan sa private sector ug academe.
Sigun pa sa maong bag-ong balaod, apil sa mapahamtangan og silot ang illegal access, illegal interception, data interference, system interference, misuse of devices.
Apil pa ang ubang computer-related offenses, computer-related forgery, computer-related fraud ug computer-related identity theft.
May tukmang silot na usab ang gitawag nga content-related offenses sama sa cybersex, child pornography, unsolicited commercial communications ug cyber squatting. (PIA-Bohol/ECB/I-gg)
Seguridad sa US diplomats sa nasud, giseguro sa Malakanyang
TAGBILARAN CITY, Bohol, Sept. 17 (PIA)–Giseguro sa Malakanyang ang seguridad sa mga diplomat ug empleyado sa United States Embassy sa Manila human sa mga pag-atake sa mga konsulado sa Amerika sa ubang Muslim countries.
Matud pa ni Deputy Presidential Spokesperson Abigail Valte, gihingosgan na sa gobyerno ang seguridad sa embahada pinaagi sa pagbutang og dugang polis sa maong mga buhatan.
Kahinumdoman nga nagsugod ang sunod-sunod nga pag-atake sa mga Muslim sa mga Amerikano sa lilas nga “Innocence of Muslims” nga giingong nagpakita sa Islam isip “cancer” samtang gipakita usab ang propetang si Mohammed nga natulog kauban ang mga babaye.
Sigun pa kang Valte, wala niya nakita nga makaapekto sa mga Muslim sa Pilipinas ang maong video o mauli usab kini sa kaguliyang.
“The Muslim community here always conduct themselves with good will and sobriety,” matud pa ni Valte. (PIA-Bohol/ECB/I-sjp)