TAGBILARAN CITY, Bohol, July 03 (PIA)–Gi-uswag sa Nobyembre 3 ang deadline sa pagpaule sa mga undocumented OFWs gikan sa Saudi Arabia.
Sa usa ka press conference, gibutyag ni Foregn Affairs Spokesperson Raul Hernandez nga gi-uswag sa Saudi government ang deadline alang sa mga illegal workers hangtud sa Nobyembre 3.
Dungan niini, gitambagan sa DFA ang mga OFWs nga pahimoslan kining kahigayonan aron tarungon ang ilang mga papeles apil na kadtong mga undocumented OFWs nga stranded nga mokuha og exit visas o di kaha tarungon ang ilang lehitimong pagpabilin sa Saudi.
Ang bag-ong extension sa mga illegal OFWs sa Saudi maoy tubag ni Saudi King Abdullah bin Abdulaziz sa hangyo sa mga nasud apil na ang gobyerno sa Pilipinas nga i-uswag pa ang gihatag nga deadline sa mga illegal foreign workers agig pagsunod sa bag-ong gipatuman nga Saudization policy sa kingdom.
Kahinomduman nga matapos unta karong adlawa, Hulyo 3 ang unang 3-months reprieve ni King Abdullah. Gikalipay sa mga OFWs ang bag-ong 4 ka buwan nga extension. (PIA-Bohol/ecb)
DFA, nipahimangno sa mga Pinoy sa Egypt taliwala sa mga lihok protesta
TAGBILARAN CITY, Bohol, July 03 (PIA)–Gipahimangnuan sa Department of Foreign Affairs (DFA) ang mga Pinoy sa Egypt nga likayan una ang mga pampublikong lugar ug dili gayud mosalmot sa mga demonstrasyon.
Taliwala kini sa padayon pang pag-monitor sa embahada sa Pilipinas sa Egypt sa nagka-grabeng tensyon sa maong nasud tungod sa halapad nga lihok protesta nga nanawagan sa pagpakanaug sa puwesto ni Egyptian President Mohammed Morsi.
Matud pa ni DFA spokesperson Raul Hernandez, padayon nga nakig-alayon ang embahada sa Cairo sa mga Filipino community sa Egypt.
Giingong updated usab ang pagpagawas og advisory sa mga Pinoy didto sa Egypt kalabot sa halapad nga lihok protesta.
Nahibaw-an nga nagpagawas na og ultimatum ang militar alang kang Morsi nga resolbahon ang krisis sa nasud. (PIA-Bohol/ecb)