TAGBILARAN CITY, Bohol, Feb. 28 (PIA)–Gi-uswag sa Civil Service Commission (CSC) ang aplikasyon alang sa Career Service Professional and Sub-Professional written examinations hangtud Marso 5 (Martes).
Karong adlawa unta matapos ang pagsumitir sa aplikasyon alang sa Abril 14 nga pasulit apan gi-uswag kini aron mas daghan pa ang makakuha og eksaminasyon nga gikinahanglan kun mosulod sa gobyerno.
Apil sa mga requirements ang mga mosunod: Application Form (CS Form No. 100, Revised 2012) nga makuha sa regional ug field offices sa CSC ug mahimo usab sa CSC website nga www.csc.gov.ph; 4 passport-sized ID pictures; original ug photocopy sa valid ID; original ug photocopy sa birth certificate gikan sa NSO o Local Civil Registrar kun walay date of birth ang valid ID; ug P500 nga examination fee.
Mahimong isumitir ang application form sa buhatan sa CSC dinhi nga nahimutang sa Barangay Dampas ning syudad sa Tagbilaran.
Alang sa ubang detalye, mahimong motawag lang sa ilang linya sa telepono nga 501-7046 o bisitaha ang ilang website nga www.csc.gov.ph http://www.csc.gov.ph/. (PIA-Bohol/ecb/p-hd)
Koleksyon sa buhis niadtong Enero, nisaka og 11.27%
TAGBILARAN CITY, Bohol, Feb. 28 (PIA)–Nisaka og 11.27 porsyento ang nakolektang buhis sa Bureau of Internal Revenue (BIR) niadtong buwan sa Enero.
Sa kinatibuk-an, naka-kolekta ang BIR og P94.74 bilyon diin P89.03 bilyon niini gikan sa BIR operations samtang P5.71 bilyon ang gikan sa non-BIR operations.
Mas taas kini kun itandi sa P85.15 bilyong nakolekta niadtong Enero 2012.
Ang BIR nagtinguha nga maka-kolekta og P232.67 bilyon sa unang kwarter sa 2013, mas taas gamay sa P229.04 bilyon nga ilang nakolekta sa susamang kwarter sa niaging tuig.
Ang buhatan nagtinguha nga makakolekta og daku sa mosunod nga tulo ka kwarter — P358.3 bilyon (Abril-Hunyo), P306.87 bilyon (Hulyo-Setyembre) ug P321.43 bilyon (Oktubre-Disyembre).
Malaumon ang BIR nga daku ang ilang makolekta karong tuiga tungod sa pagpalabang sa sin tax bill nga nakapasaka sa excise tax rates sa mga produktong sigarilyo ug bino. (PIA-Bohol/ecb/i-ed)
