MANILA, Feb. 10 (PIA)–May tanyag nga trabaho ang Department of Education (DepEd) pinaagi sa Office of the Undersecretary for Regional Operations, sa pipila ka estudyante nga gustong mokita karong summer vacation.
Gipahibalo sa DepEd nga nangdawat na sila karon og aplikasyon alang sa Special Program for the Employment of Students (SPES).
Ang SPES usa ka tinuig nga summer employment program sa DepEd nga nagtinguha sa pag-aghat sa mga estudyante nga himuong produktibo ang ilang bakasyon gawas pa sa oportunidad nga mokita og dugang salapi nga ilang magamit sa pagbukas sa klase.
Gipangunahan sa Department of Labor and Employment (DOLE) kining maong programa nga gisuportaan usab sa uban pang mga ahensya sa gobyerno.
Ang kwalipikasyon alang sa mga interesadong mosulod niining summer jobs kinahanglang estudyante o out-of-school youth nga may edad 18 anyos hangtud 25 anyos.
Kinahanglan usab naka-enroll sa usa ka tunghaan o kun dili gani, angay adunay intensyong mo-enrol sa sunod nga school year.
Dili angay molapas sa P143,000 ang gihiusang tinuig nga kita sa mga ginikanan sa estudyante.
Kinahanglan usab nga adunay office-related ug computer-related skills ang interesadong aplikante.
Mahimong ma-download ang application form pinaagi niining link nga:
http://tinyurl.com/DepEdSPES2014.
Kun madawat ang aplikante, 30 ka adlaw kining mo-trabaho ubos sa supervision sa SPES 2014 Secretariat sa DepED – Central Office.
Dinhi sa lalawigan sa Bohol, mahimo usab mobisita sa buhatan sa Bohol Employment and Placement Office (BEPO) nga nahimotang sa Kapitolyo alang sa dugang detalye. (PIA7-Bohol/ECB)