TAGBILARAN CITY, June 8 (PIA)–Sa Hunyo trese na magbukas sa klase ang mga pampublikong tunghaan sa tibuok nasod.
Kalabot niini, subling nipahinumdom ang Department of Education (DepEd) kalabot sa gipatuman nga “No Collection Policy” o pagbawal nga mangolekta og bayronon sa mga estudyanteng nag-enrol alang sa school year 2016 ngadto sa 2017.
Matud pa sa DepEd nga matag panahon sa enrollment, kanunay silang makadawat og reklamo kalabot sa pagpangolekta og mga bayronon nga dugang nagpalisod sa mga ginikanan.
Ubos sa DepEd Order Number 41 series of 2012, bawal mangolekta sa mga estudyante sa kindergarten hangtud grade 5 sa tibuok school year.
Samtang sa Hunyo taman Hulyo epektibo ang ‘No Collection Policy’ alang sa grade 5 ngadto sa grade 10 o fourth year high school students.
Giingong mahimo lamang mangolekta ang mga tunghaan sa Agosto apan angay nga boluntaryo kini ug dili compulsory.
Apil sa mga bayronon na awtorisado sa DepEd ang membership fee alang sa Boy Scouts ug Girl Scouts of the Philippines, Anti-Tuberculosis Fund Drive, Parents-Teachers Association, school publication fee ug Parents-Teachers Association fee.
Ang ‘No Collection Policy’ usa ka anti-poverty measures sa DepEd nga tuyong aghaton ang mga ginikanan nga patunghaon sa eskwelahan ang ilang mga anak.
Sa ingon niining pamaagi, magamit sa mga ginikanan ang ilang salapi sa mas importanteng panginahanglan sama sa pagkaon ug pamiliti sa mga bata. (ecb/PIA7-Bohol)
