TAGBILARAN CITY, November 9 (PIA)–Ang Department of Education (DepEd) nipasalig nga ang Senior High School (SHS) Voucher Program magpabiling mohatag og tabang pinansiyal sa mga kwalipikadong nakatapos sa Grade 10 nga gustong mo-enroll sa non-DepEd SHS taliwala sa taho nga ang maong voucher program dili na modawat sa school year 2017-2018.
Agi og pagsubay sa pasalig sa paghatag og dekalidad nga edukasyon alang sa tanan, ang DepEd nipagawas niadtong Oktubre 28, 2016 sa Department Order No. 66, series of 2016 (DO 66, s. 2016) nga nagtinguha sa paghatag og klaro ug detalyadong sumbanan sa implementing processes kalabot sa application for vouchers gikan sa prequalification ngadto na sa katubsanan.
Ang DepEd nag-abli usab og SHS VP online application niadtong Nobyembre 2, 2016.
“We will continue cooperation with the private sectors and private communities, as well as with bilateral and multi-lateral institutions. Hindi natin sila maiiwasan dahil malaking contribution ang magagawa nila. Pero tayo ang magsasabi kung anong gusto natin. We will cooperate with them,” matud pa ni DepEd Kalihim Leonor Magtolis Briones.
Ang SHS VP nagtinguha sa pagbulig sa katungod sa mga estudyante sa quality basic education, paghatag katakos sa pagpili sa mga estudyante, pagpausbaw sa kadaiyahan sa senior high schools, ug paghupay sa pinansiyal impak sa higher educational institutions nga makasinati og pagkunhod sa enrolment sa unang pipila ka tuig sa implementasyon sa SHS.
Sa 2017 budget sa kapin P550 bilyon sa departamento, P23 bilyon niini ang gigahin sa SHS VP, samtang ang nahabilin alang sa public sector education.
Mga estudyante sa Grade 10 lamang ning kasamtangang school year ang madawat sa SHS VP. Kining mga nakatapos sa Grade 10 bahin-bahinon ngadto sa awtomatikong kwalipikadong estudyante ug voucher applicants (VA).
Walay bayad ang aplikasyon ug mahimo kining ipahigayon manually.
Gitakda ang deadline niini sa Enero 13, 2017 samtang sa online application, sa Pebrero 10, 2017 ang deadline. (ecb/PIA7-Bohol)