TAGBILARAN CITY August 12 (PIA)–Bawal na karon ang di paghatag og saktong sukli human hingpit nang nahimong balaod ang ‘No Shortchanging Act’ o Republic Act 10909.
Ubos niining bag-ong balaod, mapahamtangan na ug mamultahon ang mga molapas niini ug mahimong pahamtangan og suspensyon sa lisensya kun mapamatud-ang wala nihatag og saktong sukli ang mga tindahan o bisan ang mga pampublikong sakyanan, hangtud sa katapusang sentimo.
Dugay na kining isyu ug reklamo sa katawhan ug gi-aksyunan na kini karon sa gobyerno.
Dili na mahimong ipasumangil nga walay sinselyo ang mga tindahan o mga sakyanan ug dili na usab mahimong kendi na lang ang isukli sa mga grocery tungod kay mahimo na kining ireklamo ug pahamtangan na og silot ang mga mapamatud-ang molapas niini.
Ang kasagarang pamalibad nga walay sensilyo maong kulang ang panukli, dili na mahimong gamitong palusot karon.
Kun nagtinda o namasahero, angay nga mag-andam og igong sensilyo para panukli.
Usa pa sa resulta niini mao ang pagpabalik sa paghatag og importansiya sa atong mga sensilyo.
Giingong angay ibalik nga irespeto ang mga sensilyo sa Pilipinas ug dili kini angay taguan.
Gipaabot na karon nga ma-sirkular og balik ang mga sensilyo tungod kay kinahanglan man kining ipanukli. Malikayan na usab ang hoarding o pagtago sa mga sensilyo nga hingpit nga gidili sa gobyerno. (ecb/PIA7-Bohol)