TAGBILARAN CITY, November 3 (PIA)–Ang diyosesis sa Tagbilaran magsaulog sa ilang Diocesan Diamond Jubilee sa Nobyembre 6 taman 8, 2016.
Sa unang adlaw sa kasaulogan, ang mga tumatambong mohatag og pahinungod kang outgoing Diocese of Tagbilaran bishop, Msgr. Leonardo Medroso nga magsaulog usab sa iyang ika-78 ka adlaw’ng natawhan sa susamang adlaw.
Usa ka Santos nga Misa ang mosunod sa St. Joseph’s Cathedral nga pangunahan ni Medroso sa alas 6:00 sa buntag.
Sa mao gihapong adlaw, gatosan ka mga kabos ang benepisyaryo sa ipahigayong medical mission nga gitawag og “Breaking Bread Through Service” nga magsugod sa alas 8:00 sa buntag sa Plaza Rizal, atbang lamang sa St. Joseph Cathedral.
Kining kalihokan agi og pagpatuman sa panag-ambit sa suga ni Kristo ngadto sa mga kabos, sa mga adunay sakit, walay panimalay, mga gigutom ug mga piniriso.
Ang main event niining kasaulogan mao ang Diamond Jubilee Eucharistic Celebration sa Nobyembre 8 sa alas 10:00 sa buntag nga ipahigayon sa St. Joseph Cathedral diin pangunahan gihapon kini ni Bishop Medroso isip main celebrant.
Ipahigayon usab sa katapusang adlaw ang Barrio Fiesta sa Basic Ecclesial Community ug ang fireworks display sa cathedral grounds.
Gibutyag ni Fr. Agerio Paña, chancellor sa Diocese sa Tagbilaran nga walo ka Bol-anong obispo lakip ni Archbishop Bernardito Auza, papal nuncio ug permanent observer sa Vatican to the United Nations ang motambong sa tulo ka adlaw nga kasaulogan sa diamond jubilee sa Diocese sa Tagbilaran.
Ang mga Bol-anong Obispo nga motambong sa ika-75 nga anibersaryo sa Diocese sa Tagbilaran mao silang Archbishop Jose Advincula sa Diocese of Capiz, Military Ordinariate Bishop Leopoldo Tumulak, Bishop Jose Bantolo sa Diocsese of Masbate, Bishop Antonieto Cabahug sa Diocese of Surigao, Bishop Patrick Daniel Parcon sa Diocese of Talibon, Bishop Arturo Bastes sa Diocese of Sorsogon ug Bishop Juan de Dios Pueblos sa Diocese sa Butuan. (ecb/PIA7-Bohol)