DOH Kalusugang Pangkalahatan Roadshow, ipahigayon sa Anda sa Biyernes
TAGBILARAN CITY, Bohol, Nov. 12(PIA)–Ipahigayon sa lungsod sa Anda, lalawigan sa Bohol ang Department of Health (DOH) on Wheels: Kalusugang Pangkalahatan (KP) Roadshow karong Biyernes, Nobyembre 14, 2014..
Ang DOH-Regional Office 7, sa pakigtambayayong sa nagkalain-laing kaabag nga ahensiya mopahigayon sa maong kalihokan nga nagtinguhang hingosgan pa ang health promotion efforts sa gobyerno pinaagi sa sadya nga kalihokan nga magtanyag og mga serbisyong panglawas ug awareness-raising nga mga kalihokan sa pakig-lambigit sa mga gi-ilang grupo sa komunidad.
Adunay ipahigayon nga Public Forum nga pangunahan ni DOH Asec. Jeanette Garin ug mga kauban niini sa DOH Central Office.
Pagatambongan usab ang maong Public Forum ni Gob. Edgar Chatto ug mga mayor sa kalungsoran.
Ang Kalusugang Pangkalahatan o Universal Health Care sa DOH nagtinguhang maabot sa labing kabus ang de-kalidad nga serbisyo sa panglawas ug kahimsog.
Apil usab sa Kalusugang Pangkalahatan ang pag-ugmad sa mga tambalanan ug rural health units sama sa nagpadayong mga hospital modernization programs sa Bohol.
Kini kabahin sa gitawag ni Presidente Benigno ‘Noynoy’ Aquino III nga social contract tali sa iyang mga boss—ang katawhang Pilipino. (ecb/PIA7-Bohol)
