MANILA, Jan. 09 (PIA)–Tungod sa pagkatap sa tigdas karong panahon sa ting-tugnaw, manghatag og dugang pang bakuna ang Department of Health (DOH) alang sa halos 13 milyong kabataan karong tuig ilabi na sa mga lugar nga adunay taas nga natalang kaso niini.
Matud pa ni Health Secretary Enrique Ona, apil sa mga mahatagan og bakuna ang mga batang naa sa 11 ka buwan hangtud 5 ka tuig ang pangidaron.
Una nang gipahayag sa DOH nga kaduha angay mabakunahan ang usa ka bata gikan 11-15 ka buwan ug 5-14 anyos.
Giingong tuyo niining pagbakuna nga mahulipan ang kulang nga bakuna sa usa ka bata gikan sa tuig 2011 aron padayong malikay sa maong sakit.
“The supplemental immunization activity is aimed at the children who missed their routine vaccine dosses since 2011,” matud pa ni Ona.
Nasayran nga kasagarang health centers ug regional health units nanghatag og first dose sa measles vaccine sa 9-11 ka buwan.
Samtang ang ikaduhang bakuna ginahatag usab sa mga batang naa sa 12-20 ka buwan.
Gitataw sa DOH nga dali lang masulbad ang problema batok sa tigdas kun magtinabangay ang gobyerno, pribadong sektor ug mga ginikanan nga pabakunahan ang ilang mga anak. (PIA7-Bohol/ECB)