MANILA, April 13 (PIA)–Ang grabeng nasinati nga kainit hulga usab sa nagkalain-laing sakit mao nga nipahinumdom ang Department of Health (DOH) nga ampingan gayud ang panglawas aron makalikay sa unom ka sakit nga dala sa summer season.
Matud pa sa tigpamaba sa DOH nga si Dr. Lyndon Lee Suy, una sa angay nga bantayan ang heat stroke tungod kay kuyaw kini ilabi na karong sobra ka init ang sidlak sa adlaw.
Giingong angay usab mag-amping sa bunga’g-singot, pagbaton ug butoy-butoy, sore eyes, pagsakit sa tiyan ug rabies.
Dala usab sa grabeng ka-init ang mas daling mapan-os ang mga pagkaon mao nga susihon gayud og maayo ang pagkaon ilabi na ang adunay mga sangkap nga tomato sauce nga da-ling mapan-os aron makalikay sa food poisoning ug pagsakit sa tiyan.
Gitataw sa DOH nga angay gayud maligo kada adlaw ug kun mahimo ikaduha hangtud ikatulo maligo kun gikinahanglan aron matangtang ang mga bacteria nga dala sa singot.
Giingon usab nga kun ang usa ka tawo init ang ulo kun init ang panahon, susama ra usab kini sa mga gibuhing hayop mao nga mas taas ang insidente sa pagpaak sa iro.
Gipahinumdom sa DOH nga kun mapaakan og iro, libreng ginahatag ang kumpletong walo ka bakuna sa rabies sa ilang buhatan. (ecb/PIA7-Bohol)