TAGBILARAN CITY, Bohol, Jan. 16 (PIA)–DILI angay mo kumpiyansa ang publiko sa pagkuyanap sa influenza o flu sa nasud, atubangan sa taas nga kaso niini sa Estados Unidos tungod sa bugnaw nga panahon o cold season.
Kini ang pasidaan ni Health Secretary Enrique Ona diin miingon kini nga bisan dili angay kahadlokan ang influenza, dili usab angay mo kumpiyansa tungod kay posibleng ikamatay kini ilabi na kun mapasagdan ug ang mga biktimang naigo niini adunay underlying illnesses o mga buntis ug mga bata.
Pipila sa angay nga bantayan ang hilanat nga may kaubang sore throat ug ubo.
Ang Influenza usa ka viral illness nga mahimong mokuyanap ug makatakod sa uban pinaagi sa droplets kun adunay gi-ubo o bisan nakig-estorya lamang og duol kaayo.
Matud pa ni Ona nga kuyaw gayud ang influenza sa mga bata, buntis, tigulang ug adunay mga sakit nga sama sa heart, kidney, o lung disease tungod kay mas mohinay ang ilang resistensya nga mahimong maule sa pneumonia complications
Apan gibutyag ni Ona nga makatabang ang flu vaccine ilabi na sa mga indibidwal nga may hinay nga immune system. (PIA-Bohol/ecb/i-hd)
Belmonte, kasamtangang caretaker sa 2nd Dist. sa Bohol
TAGBILARAN CITY, Bohol, Jan. 16 (PIA)–Kasamtangang mobarug isip caretaker sa ikaduhang distrito sa Bohol si House Speaker Feliciano Belmonte Jr.
Kini human nitaliwan na sa laing kalibotan niadtong Disyembre 25, 2012, si 2nd district Rep. Erico Aumentado tungod sa sakit nga pneumonia.
Giingong nagpasabot lamang kini nga direktang si Belmonte ang makipag-alayon sa mga staff sa nitaliwan nang kongresista kalabot sa mga operasyon niini ug kalabot na usab sa panginahanglan sa mga constituent niini.
Pasabot pa sa lider sa Kamara, wala nay ipahigayon pa nga special elections sa maong distrito tungod kay duol naman ang election sa Mayo.
Giingong ubos sa Republic Act 7166 o ang Synchronized National and Local Elections, sa higayong adunay permanenteng bakante sa Senado o Kamara usa ka tuig sa dili pa mahuman ang termino niini, mahimong magpatawag o magpahigayon og special election alang sa nabakanteng pwesto. (PIA-Bohol/ecb/p-gg)