MANILA, Mar. 05 (PIA)–Nipasidaan ang Department of Health (DOH) sa publiko batok sa mga usong sakit karong ting-init.
Kini human sa abiso sa Philippine Atmospheric, Geophysical and Astronomical Services Administration (PAGASA) nga angay pangandaman ang mas taas nga temperatura sa nasud kun padayon nang mosulod ang ting-init sa tungatunga sa Marso.
Gikan sa kasamtangang average temperature nga 34 degrees Celsius (°C), mahimo pa kining mosaka sa 36 °C pag-abot sa Abril ug Mayo.
Bunga kini sa paghinay sa northeast monsoon o Amihan nga nagdala og bugnaw nga hangin gikan sa Siberia ug China, ug ang pagbalhin sa init nga hangin gikan sa dagat.
Tungod niini, gipaabot nga modaghan ang insidente sa allergic conjuncitivitis o sore eyes, heat stroke ug fungal infection sa panit.
Nabutang usab sa kakuyaw ang mga bata sa hulga sa dehydration ug chicken pox o hangga.
Giingong angay usab bantayan ang mas daling pagkapan-os sa mga pagkaon tungod sa init nga panahon nga mahimong makaingon og food poisoning.
Tambag pa ni DOH Acting Secretary Janette Garin, ipatuman kanunay ang kalimpyo, mokaon og mga sustansyadong pagkaon ug sigaraduhong igo ang tulog aron maalimahan ang panglawas.
May tanyag usab ang DOH og libreng bakuna batok sa measles o tipdas ug uban pang sakit sa tanang pampublikong tunghaan sa umaabot Hunyo. (ecb/PIA7-Bohol)