TAGBILARAN CITY, Bohol, Feb. 18 (PIA)–GI-ALERTO sa Department of Health (DOH) ang tanang tambalanan sa tibuok nasud batok sa giingong usa ka matang sa virus nga susama sa Severe Acute Respiratory Syndrome (SARS).
Kini human sa labing bag-ong nakumpirmang impeksyon nga Novel Coronavirus (NCOV) sa United Kingdom.
Matud pa ni DOH Spokesperson Assistant Secretary Dr. Eric Tayag, gimanduan na nila ang tanang tambalanan sa tibuok nasud nga i-report dayon ang mga grabeng kaso sa pneumonia nga nag-negatibo sa influenza virus ug bacteria aron matino kini dayon.
Sa labing ulahing taho, giingong mikabat na sa 11 ang kumpirmadong kaso sa NCOV sa tibuok kalibotan diin lima na ang namatay sa Saudi Arabia ug Jordan.
Nakitaan ang mga apektadong pasyente og mga respiratory illness nga may kaubang hilanat, ubo ug lisud sa pagginhawa.
Apan giseguro sa DOH nga wala pay natalang kaso nga NCOV sa nasud mao nga walay angay ikabalaka ang publiko.
Sa pagkakaron, gitun-an pa sa mga health officials sa tibuok kalibotan ang NCOV infection.
(PIA-Bohol/ecb/i-gg)
