TAGBILARAN CITY, Bohol, July 18 (PIA)–Gitambagan sa Department of Health (DOH) ang mga pribado ug pampublikong ospital nga ibalik ang dengue express lane.
Matud pa ni Health Assistant Secretary Dr. Eric Tayag, katuyuan niini nga mahatagan dayon og atensyong medikal ang mga pasyente nga adunay dengue nga idagan sa ilang tambalanan aron maatiman dayon ang mga pasyenteng nanginahanglan og confinement.
Kini atubangan sa pagdaghan sa dengue cases sa nasud diin sukad Enero 1 hangtud Hulyo 7, mikabat na sa 46,651 ug 294 niini ang namatay.
Nag-una sa mga lugar nga adunay pinakadaghang kaso sa dengue ang National Capital Region (NCR) sa 23.1% o 10,775 ug 55 ang patay; Region III nga may 15.06% o 7,024 ug 13 ang patay; ug Region IV-A nga nakatala og 13.3% o 6,219 ug 42 patay ang patay.
Dinhi sa lalawigan sa Bohol, natala sa buhatan sa Provincial Health Office (PHO) ang 169 ka kaso sa dengue ug 8 ang patay sukad Enero hangtud sa unang semana sa Hunyo ning tuiga. (PIA-Bohol/ecb)