MANILA, Mar. 05 (PIA)–Nipasidaan ang Department of Justice (DOJ) sa publiko nga mag-amping batok sa nikatap nga matang sa pagpangilad sa internet o online.
Sa pahayag ni Justice Secretary Leila De Lima, nagkadaghan ang mga kaso sa ‘online sextortion’ o sekswal nga pagpangilkil gamit ang internet, base sa datos nga nahipos sa DOJ.
Sa advisory nga gipagawas sa DOJ, padayon nga nadugangan ang mga nadawat nga reklamo sa Philippine National Police-Anti-Cybercrime Group (PNP-ACG) nga nag-ingong biktima sila sa ‘sextortion’.
Pasabot ni De Lima, kasagarang mogamit sa pekeng personalidad sa internet ang mga ‘sextortionist’.
“Makikipagkilala ang mga ito sa target na biktima. Kapag nakuha na nito ang tiwala ng target, hihikayatin nito ang walang kamalay-malay na biktima na gumawa ng mga sekswal na bagay habang kinukunan ang sarili,” matud pa sa kalihim.
Gamiton sa ‘sextortionist’ ang mga hulagway o video sa biktima aron makapangilkil og salapi.
Mao nga tambag ni De Lima sa mga tiggamit sa internet, ampingan ang personal information ug dili dayon mosalig sa mga dili kaila.
Matud pa sa DOJ, makapangilad lamang ang maong mga ‘sextortionist’ kun magpasagad ang online users sa pagdawat og mga dili kailang accounts. (ecb/PIA7-Bohol)
