MANILA, Mar. 6, 2014 (PIA)–Aron mapugngan ang child pornography sa nasud, gimanduan na ni Labor Secretary Rosalinda Baldoz ang tanang Labor regional directors nga palapdan pa ang Sagip Batang Manggagawa Quick Action Teams.
Kini gitukod sa nagkalain-laing rehiyon niadto pang 1993 aron mag-imbestigar ug mohimo og rescue operation sa mga menor de edad nga sayong gipa-trabaho sa mga pabrika, gi-ulipon o di kaha gitukmod sa prostitusyon.
Kini tungod na usab sa bag-ong teknolohiya nga nakaingon sa bag-ong pang-abuso sa mga kabataan pinaagi sa online live show ug cyber pornography.
Tungod niini, katambayayong sa DOLE ang National Bureau of Investigation (NBI), Philippine National Police (PNP), Department of Social Welfare Development (DSWD) ug uban pang ahensya sa gobyerno aron masumpo ang maong krimen.
Gitataw ni Baldoz nga ang gobyerno anaa aron pagsiguro nga ang mga kabataan luwas gikan sa tanang matang sa pag-abusar, pagpasagad, pahimulos nga mapanamastamason ug diskriminasyon. (PIA7-Bohol/ECB)