BOHOL, May 27 (PIA)–Ang Department of Labor and Employment (DOLE) mi-awhag sa publiko sa pagsumbong kanila sa mga establisementong dili luwas ug nagbutang sa ilang mga trabahante sa kakuyaw.
Tungod niini, nagmugna og hotlines nga matawagan 24/7 diin ang mga trabahante ug nagpakabanang lungsoranon mahimong motaho sa mga makuyaw, peligroso ug dili luwas nga mga buhatan alang sa paspas nga aksiyon.
Mahimong motawag sa Occupational Safety and Health Center (OSHC) hotline/helpdesk numero 0927-877-2587 ug (02) 928-6690 o e-mail lang sa oshc_dole@yahoo.com.
Alang sa Employees Compensation Commission (ECC), ang motawag mahimong mo-connect sa ECC pinaagi sa 0917-822-780. Ang maong hotline gidumala 24/7 ni Dr. Dianne, ECC Quick Response Team leader.
Sa Central Office sa DOLE, ang DOLE Call Center nga gidumala sa Labor Communications Office, modawat usab og mga pangutana ug reklamo sa numero (02) 527-8000.
Samtang sa Rehiyon 7, mahimong motawag ni Exequiel Salcedo III ug Ingrid Z. Yumang sa mga numero (032) 266-9722; 0917-837-1236; 0917-836-9626; o mahimong mo-email sa reu7@ecc.gov.ph.
Gimanduan ni DOLE Kalihim Rosalinda Baldoz ang OSHC ug ECC, parehong attached agencies sa DOLE sa pagbutang og kawani nga maoy modumala sa tinagsa nga mga hotline/helpdesk ug motubag sa mga pangutana ug reklamo kalabot sa health and safety sa buhatan, nga matud pa parte sa mas gipalapdan ug gihingosgan nga information ug education campaign aron ipa-usbaw ang kaamgohan ug kahibalo sa workplace safety and health.
Gimanduan usab ni Baldoz si OHSC Executive Director Teresita Cucueco, M.D. sa pagre-activate sa ilang Safety Patrol Program nga nagsugod niadtong 2012 ug palapdan ang scope ug coverage niini gikan sa construction ug ubang hazardous occupation ngadto sa ubang industriya.
Ang Safety Patrol gilangkoban sa mga eksperto gikan sa DOLE regional offices, OSHC, ug tripartite partners kinsa mopahigayon og safety audits sa mga construction sites sa tibuok nasud. Ang mga eksperto gikan sa OSHC, ang Employees Compensation Commission ug Bureau of Working Conditions mo-apil usab sa audit kun gikinahanglan. (ecb/PIA7-Bohol)