MANILA, May 4 (PIA)–Nagpagawas og pay rules ang Department of Labor and Employment (DOLE) alang sa adlaw sa eleksyon sa Mayo 9.
Matud pa sa DOLE, nahisulod sa Proclamation No. 1254 nga gi-isyu ni Presidente Benigno ‘Noynoy’ Aquino III nga tanang mo-trabaho sa adlaw sa eleksyon angay bayran og dugang 30 porsiyento sa ilang hourly rate sa unang walo ka oras sa pagtrabaho.
Kun mag-overtime, modawat siya og dugang nga 30 porsiyento sa iyang hourly rate alang sa maong adlaw.
Kun natunong sa day-off sa trabahante apan nisulod pa gihapon sa trabaho, makadawat siya og dugang 50 porsiyento nga suholan ug kun mag-overtime usab, dugang 30 porsiyento sa iyang hourly rate alang sa maong adlaw.
Kun ang empleyado dili mo trabaho sa Mayo 9, ipatuman ang “no work, no pay” principle.
Gi-deklarang special non-working holiday ang May 9 aron mahatagan og kahigayonan ang mga Pilipino nga makabotar. (ecb/PIA7-Bohol)