MANILA, August 25 (PIA)–Dako ang posibilidad nga masumpo na ang illegal recruitment sa nasod human magpagawas og kamanduan ang Department of Labor and Employment (DOLE) sa paghatag og ganti sa bisan kinsang makatudlo o makatabang sa pag-aresto sa mga illegal recruiter.
Matud pa ni DOLE Kalihim Silvestre Bello, makadawat og P50,000 cash reward ang mga concerned citizen nga mosumbong kalabot sa panghitabo nga illegal recruitment nga mosangpot sa pagkadakop sa mga illegal recruiter.
Tuyo niining ma-aghat ang katawhan nga motabang sa mga awtoridad sa pagsumpo sa illegal recruitment.
Matud pa ni Bello, maggikan ang pondo nga ihatag isip ganti sa hugpong sa mga pribado nga lisensyadong recruitment agency.
Giingong mahimong sugdan sa publiko ang paghatag og kasayuran sa higayong magsugod na ang 24/7 hotline sa DOLE.
Ning bag-o lang, gi-anunsyo sa DOLE nga magbutang sila og 24/7 hotline call services sa mga sakop niining ahensya ug mga regional offices sa tibuok nasod. (ecb/PIA7-Bohol)
