MANILA, August 5 (PIA)–Nipasidaan si Department of Public Works and Highways (DPWH) Kalihim Mark Villar sa mga contractor sa mga proyekto sa gobyerno nga wala nakatapos sa gitakdang panahon sa ilang mga proyekto.
Matud pa sa kalihim, agresibong implementasyon ang himuong stratehiya sa pagpahigayon sa mga proyekto nga nagpasabot nga target nilang himuong 24/7 ang operasyon aron mahuman dayon ang mga trabaho.
Giingong makonsiderar nga ‘golden age of infrastructure’ ang Duterte administration ug sa pagkakaron, may mga nakalinya nang mga proyekto nga himuon ang ahensya.
Samtang ipaubos usab sa performance audit sa kalihim ang mga kawani ug opisyal sa ahensya aron dili maimpluwensyahan og politika ang pagbutang og mga opisyal sa DPWH sa nagkalain-laing lugar sa nasod.
Usa usab sa tutokan ni Villar ang pagsugpo sa kurapsiyon sa buhatan base na usab sa mandato ni Presidente Rodrigo Duterte.
Human niluwat isip magbabalaod, pormal nang nangalagad isip bag-ong kalihim sa DPWH si Villar nga kanhi Kongresista sa Las Piñas. (ecb/PIA7-Bohol)