TAGBILARAN CITY, September 30 (PIA)–Nagplano karon ang presidente sa League of Municipalities (LMP) sa Bohol sa pagpaubos sa drug test sa tanang mayor ning lalawigan.
Si Clarin Mayor Allen Piezas, ang LMP President sa Bohol atol sa pakighinabi sa usa ka lokal nga estasyon sa radyo dinhi miingon nga iya unang konsultahon ang ubang miyembro sa organisasyon kalabot sa gitanyag nga lakang sa sunod nga panagtapok nila sa Oktubre.
Matud pa ni Piezas, kining lakang agi og pagpakita sa mga local chief executives sa ilang suporta sa kampanya sa administrasyon ni Presidente Rodrigo Duterte sa pagbatok niini sa ilegal nga droga.
Niadtong Hulyo 27, 2016, human gipangulohan ang labing una niyang National Security Council meeting, si Presidente Duterte nanawagan sa mga local government officials sa pagsuporta sa iyang kampanya batok sa ilegal nga droga.
Ang pagpaubos usab sa drug testing sa mga mayor sa kalungsoran ug syudad, maghatag og maayong ehemplo alang sa ilang mga konstituwente.
Sukad gilusad ang gihingosgang kampanya sa nasodnong kagamhanan batok sa ilegal nga droga, ang mga mayor sa Balilihan, Dauis ug Panglao boluntaryong mipaubos sa drug testing ug namapatud-ang negatibo sa bisan unsang drug traces.
Ang mga mayor sa probinsiya ang mga nangulo sa Municipal Peace and Order Council ug Municipal Anti-Drug Abuse Council sa ilang mga nagkadaiyang lungsod.
Ang maong mga organisasyon ang nag-atiman sa kahusay ug kalinaw sa matag lungsod ug kampanya sa mga munisipalidad batok sa krimen ug mga aktibidad sa ilegal nga droga. (ecb/PIA7-Bohol)