TAGBILARAN CITY, Bohol, Jan. 16 (PIA)–Nipasidaan ang Department of Trade and Industry (DTI) kalabot sa giingong gibaligyang pekeng Import Commodity Clearance (ICC) sticker sa helmet.
Matud pa ni DTI Undersecretary Zenaida Maglaya, may nadawat silang impormasyon kalabot sa mga ICC sticker nga gibaligya sa kantidad nga P150 alang sa mga motorcycle riders nga wala nakaapas sa deadline sa inspeksyon sa helmet sa ilang buhatan.
Pasidaan pa ni Maglaya, kahibalo ang mga enforcer sa Land Transportation Office (LTO) sa kalahian sa mga tinuod ug pekeng stickers, ug multahan gayud ang mga masakpang motor rider.
Dugang pa niini, pagamultahan usab ang retailers nga mapamatud-ang nagbaligya og mga pekeng stickers o mga helmet nga may pekeng ICC, gawas pa sa kasong paglapas sa Helmet Law.
Tambag sa DTI sa mga motor riders nga walay ICC stickers, mopalit na lamang og de kalidad nga helmet.
Si Maglaya nagkanayon nga may mapalit na karong helmet nga may orihinal nga ICC sa kantidad nga P800 hangtud P1,000. Mas barato pa kini kun itandi sa P1,500 nga multa sa unang paglapas sa Helmet Law kun masakpan sa mga enforcers.
Katapusang pahinumdom ni Maglaya sa mga motorist nga ang pagsul-ob og helmet dili lamang aron dili sila madakpan apan alang sa ilang kaayohan ug proteksyon. (PIA-Bohol/ecb/g-hd)
Bautista, bag-ong AFP chief
TAGBILARAN CITY, Bohol, Jan. 16 (PIA)–Gitudlo ni Preisdente Benigno “Noynoy” Aquino III si Lieutenant General Emmanuel T. Bautista isip bag-ong Chief of Staff sa Armed Forces of the Philippines (AFP).
Epektibo kini sa Enero 20, 2013 diin hulipan ni Bautista ang magretiro nang si General Jessie Dellosa.
Si Lt. Gen. Bautista ang kasamtangang Commanding General sa Philippine Army ug kanhi na usab nga Commander sa 3rd Infantry Division sa Philippine Army.
Miyembro siya sa Philippine Military Academy “Dimalupig” Class of 1981 ug nakatapos sa iyang Masters in Public Administration sa University of the Philippines, Diliman. (PIA-Bohol/ecb/p-gg)