TAGBILARAN CITY, Bohol, June 06 (PIA)–Nipasidaan ang National Bureau of Investigation (NBI) ug Department of Trade and Industry (DTI) sa publiko batok sa pagkuyanap sa mga group buying sites nga nagtanyag og sobra ka baratong mga produkto, bakasyon o serbisyo.
Kalabot kini sa kapin 100 ka reklamo nga nadawat sa DTI kalabot sa mga pangilad sa mga website nga nagtanyag og mga baratong deals ug services.
Gipaimbestigahan na karon sa NBI ang maong mga website ilabi na ang Cleverbuy.
Bisan gipasabot ni Migdinio Congzon Jr., Chief sa Computer Crimes Unit sa NBI, nga lisud na mabawi pa ang gibayad sa mga biktima sa maong website ilabi na nga wala pay ahensya sa gobyerno ang nitutok sa pagdala sa maong mga group buying sites sa internet, mahimong kasuhan og estafa o swindling kining maong matang sa pagpangilad.
Pahinumdom sa mga awtoridad, tun-an una og maayo ang kumpanya sa dili pa mobayad aron dili mabiktima.
Tambag usab ang NBI sa mga konsumidor nga dili magpadala dayon sa mga gimik sa group buying sites ilabi na sa mga dili katuhuan nga mga tanyag niini. (PIA-Bohol/ecb)
DSWD nipasidaan batok sa text scams nga nigamit sa Pantawid Pamilya
TAGBILARAN CITY, Bohol, June 06 (PIA)–Nipasidaan ang Department of Social Welfare and Development (DSWD) sa publiko ilabi na ang mga benepisyaryo sa Pantawid Pamilyang Pilipino Program batok sa pangilad sa text nga nagtuyok karon.
Ang maong text nga giingong gikan sa nagpaila nga usa ka Lea Ramos nga may mensaheng “Congratulations, President Noy-Noy Aquino Foundation 4Ps Pantawid Pamilyang Pilipino Program, your sim # won P950,000 as second prize winner in the Handog Pangkabuhayan raffle promo, DTI 0154s’12, “ dili tinuod.
Nipahimangno ang DSWD nga wala silay bisan unsang raffle promos o draws nga ingon niini.
Gi-aghat sa DSWD ang mga makadawat niining maong text message nga isumbong dayon kini sa pinakaduol nga buhatan sa DSWD o mo text sa Pantawid Pamilya Grievance Text Hotline 0918-912-2813.
Mahimo usab motawag sa DSWD Information Officer nga si Aileen P. Lariba sa numero 0917-381-5555 o (032) 2321192 loc. 123. (PIA-Bohol/ecb)