BOHOL, Jan. 29 (PIA)–Gi-awhag sa Department of Education (DepEd) ang mga ginikanan ug estudyante nga mosalmot sa early registration sa tanang public elementary ug secondary schools ugma, Enero 30 taman Pebrero 29 alang sa school year 2016-2017.
Matud pa ni DepEd Kalihim Armind Luistro, ipahigayon ang sayo nga pagpa-rehistro aron mahatagan og igong panahon ang DepEd nga pangandaman ang bul-og sa mga estudyante sa pagbukas sa klase sa Hunyo.
Giingong usa usab kini ka paagi aron masolusyonan ang nagkalain-laing problema sa pagbukas sa klase sama sa panaghuot sa mga estudyante sa mga lawak-tunghaan.
Nanawagan usab si Luistro sa mga magtutudlo nga magpahigayon og house-to-house campaign o pakigpulong sa mga lokal nga opisya sa barangay o civic organization aron awhagon ang mga estudyante nga mosalmot sa early registration.
Target sa sayong pagpa-rehistro ang mga 5 anyos nga mga bata nga mosulod sa kindergarten apil na ang mga motungtong sa grade 1.
Ang mga bata nga motungtong na og 5 anyos sa Hunyo 1 dawaton na sa kindergarten ug ang naka-kumpleto na og kindergarten dawaton na sa Grade 1. (ecb/PIA7-Bohol)
