TAGBILARAN CITY, Bohol, Nov. 28 (PIA)–Nilambo ang Gross Domestic Product (GDP) sa nasud sa ikatulong quarter ning tuig, matud pa sa National Statistical Coordination Board (NSCB) karong adlawa.
Gikan Hunyo hangtud Setyembre, nilambo ang ekonomiya sa nasud og 7.1 porsiyento, labaw sa gi-target sa gobyerno nga 5 hangtud 6 porsiyento.
“We are on our way to exceeding our target of 5-6 percent,” matud pa ni Socioeconomic Planning Sec. Arsenio Balisacan.
Gitumbok usab sa NSCB nga nakatabang ug daku sa maayong performance sa ekonomiya ang industry ug services sectors.
Ang maong pagsaka sa GDP ang labing paspas nga natala sa tanang mga nasud sa Southeast Asia ug ika-duha kini sa 7.7 porsiyento sa China, nga nanguna sa tibuok East Asia.
Bisan siyam ka buwan pa lamang ang nakalabay, nakapatala na og 6.5 porsyento nga paglambo gikan Enero hangtud Setyembre, diin nalabwan niini ang target nga paglambo sa ekonomiya nga 5 hangtud 6 porsyento alang sa tibuok tuig. (PIA-Bohol/ecb/I-ed)
NDRRMC, nangandam na sa satellite launch sa SoKor
TAGBILARAN CITY, Bohol, Nov. 28 (PIA)–Madayon na ang satellite launch sa South Korea sa Nobyembre 29, Huwebes human ang pipila ka higayon nga wala kini gipadayon.
Base sa gipagawas nga advisory sa National Disaster Risk Reduction and Management Council (NDRRMC), miingon si Executive Director Benito Ramos nga alas-3:00 sa hapon sa Pilipinas gipaabot nga buhian ang satellite.
Base sa kalkulasyon, mohagsa ang unang rocket booster sa satellite sa gilay-ong 450 nautical miles sa Palanan, Isabela.
Mohagsa usab sa kadagatan sa Eastern Samar sa gilay-ong 340 nautical miles ang ikaduhang booster, samtang sa kadagatan sa Surigao mohagsa ang uban pang debris.
Kalabot niini, gibutang na sa blue alert status karong adlawa ang tanang ahensyang motutok sa satellite launch.
Alas-8:00 usab ugma sa buntag, Huwebes, ipasaka ang red alert status.
Gi-anunsyo usab ni Ramos nga hingpit nilang gipatuman ang no fly zone, no sail zone ug no fish zone sa Kadagatang Pasipiko.
Nanawagan ang NDRRMC sa mga apektadong residente nga mag-amping ug mosunod sa abiso sa mga awtoridad. (PIA-Bohol/ecb/I-gg)
