TAGBILARAN CITY, Bohol, Sept. 10 (PIA)–Malipayong gibalita ni Presidente Benigno “Noynoy” Aquino III sa iyang pagbalik sa atong nasud ang malampuson niyang byahe gikan sa pagtambong sa Asia Pacific Economic Cooperation (APEC) Leaders’ Meeting sa Vladivostok, Russia.
Sa iyang arrival speech kagahapon sa hapon, gihisgotan usa-usa sa pangulo ang iyang mga gihimo sa maong pulong, kauban ang uban pang lider sa mga nasud sa Asya.
Giingong sa pakighinabi niya sa mga lider sa ubang nasud, napalig-on pa ang pundasyon sa kooperasyon ug kalinaw sa atong rehiyon.
Kining maong mga gimbuhaton giingong maoy dalan alang sa pagpanday sa mga estratehiyang magpalig-on sa kahibalo ug pamohunan.
Gituki usab ang food security ug mga plano aron batokan ang posibleng pag-igo sa problemang may kalabot sa hisgotang pinansyal.
Gibalita usab sa Pangulo ang pag-agda sa Chile nga mag-invest ang mga negosyanteng Pinoy sa ilang nasud, samtang bukas usab silang mokuha og mga magtutudlong Filipino nga mopa-ambit sa ilang kahibalo sa ilang mga estudyante.
Plano usab sa Chile nga makig-alayon sa Pilipinas sa pagpa-ugmad sa pagmina ug aqua culture projects. (PIA-Bohol/ECB/I-ed)
Sanate probe batok ni Puno, Ok sa Palasyo
TAGBILARAN CITY, Bohol, Sept. 10 (PIA)–Gitumbok sa Malacañang nga gawasnon ang Senado nga mopahigayon og imbestigasyon kalabot sa pagkalambigit ni DILG Undersecretary Rico Puno sa pipila ka kontrobersya.
Mismong si Sen. Miriam Santiago ang manguna sa imbestigasyon partikular sa isyu nga suod kaayo o lakas si Puno kang Presidente Benigno “Noynoy” Aquino III bisan pila ka higayon na kining nalambigit sa kontrobersya sama sa jueteng ug labing ulahi ang pagsuway niining pagsulod sa condominium ni Sec. Jesse Robredo human nihagsa ang gisakyang eroplano niini.
Matud pa ni Deputy Presidential Spokesperson Abigail Valte, katungod ni Santiago isip magbabalaod nga mopahigayon og imbestigasyon.
Sigun pa kang Valte, nagtuo silang ang himuong imbestigasyon “in aid of legislation” aron makahimo og usa ka mahinungdanon nga balaod.
Samtang dili gustong pangunahan sa Malacañang si Puno atubangan sa panawagang moluwat na lamang kini sa puwesto. (PIA-Bohol/ECB/I-gg)