TAGBILARAN CITY, June 13 (PIA)–Subling gipahinumdoman sa Department of Labor and Employment (DOLE) ang mga pribadong sektor sa saktong pagbayad sa ilang mga empleyado nga nisulod kagahapon dungan sa pagsaulog sa ika-118 ka tuig nga anibersaryo sa Adlaw sa Kaugalingnan o Independence Day.
Base sa pay rules sa DOLE, ang bisan kinsang empleyado nga misulod sulod sa walo ka oras makakuha og dugang 200 porsiyento sa iyang suholan.
Kun molapas sa walo ka oras ang trabaho, dugang 30 porsiyento sa hourly rate ang angay nga ibayad sa usa ka empleyado.
Apan kun wala nisulod ang usa ka empleyado, bayaran pa gihapon kini og 100 porsiyento sa iyang suholan sa maong adlaw.
Samtang ang misulod nga empleyado sa adlaw sa Hunyo 12, nga natunong sa iyang day-off, bayaran og dugang 30 porsiyento sa iyang daily rate nga 200 percent.
Base sa gilagdaang Proclamation 1105 niadtong Agosto 20, 2015 ni Presidente Benigno S. Aquino III, usa ka regular holiday ang Independence Day. (ecb/PIA7-Bohol)
