MANILA, April 28, 2014 (PIA)–Gilagdaan na sa Pilipinas ug Estados Unidos ang Enhanced Defense Cooperation Agreement (EDCA).
Gilagdaan ang maong kasabotan Lunes sa buntag sa Camp Aguinaldo nilang Defense Secretary Voltaire Gazmin ug US Ambassador to the Philippines Philip Goldberg.
Nahisulod sa EDCA nga sulod sa 10 ka tuig, dugangan ang military presence sa Estados Unidos sa Pilipinas.
Ubos niini, mahatagan og access ang mga tropang Amerikano sa mga military camps sa nasud diin mahimong magbutang ang US og mga fighter jets ug barkong pang-gubat.
Gitataw ni Goldberg nga dili buksan pagbalik ang mga US military bases sa nasud tungod sa EDCA.
Matud pa sa US envoy, tuyo lamang sa EDCA nga hingosgan pa ang defense relation sa duha ka nasud.
Giingong pag-ila kini sa duha ka nasud nga daghan pa ang angay himuon aron hingosgan ang alliance sa Pilipinas ug Estados Unidos.
Matud pa usab ni Presidential Communications Operations Office (PCOO) Secretary Sonny Coloma, ang maong kasabotan mas magpalapad pa sa kahigayonan nga mapalambo ang katakos sa larangan sa self-defense ug hugot nga maritime security sa nasud dungan sa giingong maritime domain awareness.
Taliwala kini sa nagpadayong global ug rehiyonal nga kamatuoran dungan na usab sa pagpatuman pa og mas epektibong disaster relief ug rehabilitation response.
Giingong ang mahinungdanong elemento sa kasabotan agig pagsunod na usab sa pakighiusa sa international community sa pagpatunhay sa regional peace ug stability.
“The signing of the Enhanced Defense Cooperation Agreement (EDCA) between the Philippines and the United States affirms the robust and enduring strategic partnership between the two countries”, matud pa ni Coloma. (PIA7-Bohol/ECB)
