European Union, gidayeg ang mga OFWs
MANILA, Sept. 18 (PIA)–Personal nga gi-ila ug gidayeg kagahapon ni European Commission Pres. Herman Van Rompuy ang mga overseas Filipino workers (OFWs) sa Europe.
Matud pa ni Rompuy, daku kaayo ang kontribusyon sa mga Filipino migrants sa Europe ilabi na sa pagpalambo sa ilang ekonomiya.
Gibutyag niya nga naa sa 2.3 bilyon euros ang remittance nga napadala sa mga OFWs sa Pilipinas ug Europe usab ang pinadakung employer sa Filipino seafarers.
Gidayeg usab ni Rompuy si Presidente Benigno S. Aquino III sa mga repormang gihikyad sa administrasyon niini ug misaad og dugang suporta pa ang ihatag nila sa adyenda sa administrasyon nga makamugna pa og trabaho, igong enerhiya ug reporma sa hudikatura.
Nipagawas og pahayag si Rompuy atol sa European Council human sa pakig-pulong nila ni PNoy niadtong Martes sa buhatan sa European Council ug misaad siya og dugang pang tabang pangkaugmaran sa EU sa Pilipinas sa mosunod nga unom ka tuig.
Matud pa ni Rompuy nga tungod sa maayong pagdumala ni Presidente Aquino, mapasigarbo na sa Pilipinas karon nga kini ang may pinaka-paspas nga paglambo sa ekonomya sa Asya.
Gitumbok usab niya ang walay pu-as nga pagbatok sa kasamtangang administrasyon sa mga anomaliya nga usa sa mga hinungdan sa kasamtangang kalamposan sa Pilipinas.
Gi-dugang usab ni Rompuy nga gihatagan nila og dakung bili ni Presidente Aquino ang kamahinungdanon sa kasabotan sa balikatan ug pagtinabangay nga mas magpalig-on sa pakig-alayon sa nagkalain-laing larangang sama sa migration ug disaster risk management. (ecb/PIA7-Bohol)