MANILA, Jan. 20, 2014 (PIA)–Nipasidaan karon ang Food and Drugs Administration (FDA) sa publiko batok sa gibaligyang slimming underwear pinaagi sa internet.
Base sa FDA Advisory 2014-005 ni FDA chief Kenneth Hartigan-Go, gipasidan-an niini ang publiko batok sa pagpalit og “Onami” slimming underwear products nga giingong maka-detoxify sa lawas ug sunugon niini ang body fats.
“All consumers are hereby warned against buying the said unregistered product from the market or through online,” matud pa sa advisory.
Una niini, nadiskubre sa FDA ang pagpamantala sa maong produkto nga daghang benepisyo ang gihikyad sama sa pag-detoxify sa lawas ug pagsunog sa body fats, pagpalig-on sa immune system, pagpakusog sa metabolismo, makadugang sa mental alertness, makatangtang sa fatigue ug stress, ug mga sakit, ug makapawala og body odor.
Apan matud pa sa FDA, dili rehistrado sa ilang buhatan ang maong produkto ug wala usab kini clinical o scientific studies aron magpamatuod sa mga therapeutic claims niini.
Ang FDA ang tig-regulate sa tanang produktong adunay therapeutic o health claims mao nga kinahanglan una sa maong slimming underwear nga mokuha og License to Operate (LTO) isip manufacturer o distributor gikan sa FDA.
Gitataw usab sa FDA nga kadtong mga health products nga nakaabot sa FDA standards lamang ang isyuhan nila og Certificate of Product Registration (CPR).
Gimanduan na usab ni Hartigan-Go ang manufacturers ug distributors sa maong produkto nga tangtangon sa merkado ang produkto, apil na usab ang mga mall owners ug mga outlet nga tangtangon ang produkto sa ilang mga tindahan. (PIA7-Bohol/ECB)