TAGBILARAN CITY, Bohol, Sept. 2 (PIA)–Gipasidan-an sa Food and Drugs Administration (FDA) ang publiko sa pagpalit og Citrange vitamin syrup.
Sa gipagawas nga FDA Advisory No. 2013-030, sa online report nga nadawat sa ilang buhatan pinaagi sa ilang eReport system, nakadawat sila og sumbong gikan sa usa ka inahan gikan sa Cagayan Valley kalabot sa gidudahang Citrange syrup nga gibaligya sa mga tunghaan sa ilang lugar.
Giingong sa presyong P380, maayo ang mga batang adunay hubak ug molagsik pa tungod sa giingong sangkap niini nga may vitamin C, honey bee ug royal jelly.
Nakumbinsi ang mga ginikanan sa pagpalit niini tungod na usab sa usa ka sulat nga gipakita sa nagbaligya nga giingong gikan sa Department of Education (DepEd).
Apan sukwahi sa gisaad nga epekto, mireklamo ang mga ginikanan tungod kay gipangduka ug gikapoy pagtungha sa klase ang ilang mga anak human miinom sa maong supplement.
Padayon pa kining gi-imbestigahan sa FDA karon. Apan sa inisyal nga pakisusi, dili rehistrado sa FDA ang Citrange vitamin syrup.
Ang giinong manufacturer niini, ang Linderbergh Food Products Valley sa Valenzuela City, expired na ang FDA License to Operate (RDII-MM-F-2454) ug nihunong na sa ilang operasyon sukad Disyembre 2008.
Gitambagan sa FDA ang publiko ilabi na ang mga ginikanan nga magbantay gayud aron dili mailad niini.
Alang sa ubang kasayuran ug pangutana, mahimong mo email sa FDA pinaagi sa info@fda.gov.ph. Kun motaho sa mga unregistered health product, mahimong mo email lang sa report@fda.gov.ph. (PIA-Bohol/ecb)