MANILA, November 8 (PIA)–Gihimakak sa Australian Embassy sa Manila ang mga nigawas nga taho kalabot sa giingong free visa sa mga Pilipinong moadto sa ilang nasod.
Matud pa sa Embahada, dili tinuod nga sugod sa Enero 2017, dili na pangayuan og visa sa Australia ang mga Pinoy nga mobisita sa ilang nasod sulod sa 90 ka adlaw.
Kalabot niini, nipasidaan ang Australian Embassy sa mga Pinoy nga dili mutuo sa maong mga taho ug gi-klaro nila nga kinahanglan pa gihapon og visa ang mga Pinoy.
Gihimakak usab sa Australian authority ang usa pa ka article diin nagpatik nga ang mga Pinoy nga mobisita sa Australia kinahanglan lamang magpakita og return ticket ug proof of funds nga nagkantidad og $1,500 sa dili pa sila tugotang makasulod sa maong nasod.
Matud pa nga dili usab tinuod ang migawas nga impormasyon sa social media nga misulod ang nasod sa Australia ug ang Pilipinas sa bilateral visa agreement nga magpadali sa travel barriers sa duha ka nasod.
Tambag pa sa Australian embassy sa mga Pinoy nga gustong moadto sa maong nasod nga bisitahon una ang ilang travel website alang sa ilang pahinumdom ug kun unsaon ang pag-apply og visa ug ang mga kinahanglanong dokumento. (ecb/PIA7-Bohol)
