MANILA, Mar. 12, 2014 (PIA)–Walay angay ikabalaka ang publiko sa mga genetically modified crops o kadtong mga tanom nga gimugna pinaagi sa artipisyal nga paagi.
Kini ang gitin-aw sa Department of Agriculture (DA) taliwala sa kahadlok sa ubang grupo nga nag-ingong makadaot kini sa panglawas.
Gipasabot sa pangulo sa DA Biotechnology Program ug plant molecular biologist nga si Dr. Antonio Alfonso nga adunay mga pagtuon nga magpamatuod nga luwas kaon-on ang mga GMO crops.
Gani sa kasamtangan, adunay GMO crops ang gitanom ug gitun-an karon dinhi sa nasud. Apil na niini ang golden rice, BT corn ug BT talong.
Matud pa sa pagtuon, mas kusog ang resistensya sa mga GMO crops batok sa mga sakit ug peste sa pananom.
Sa tabang sa biotechnology, ginabutang ang gene sa bacillus thuringiensis o BT, usa ka matang sa good bacteria sa pananom nga maoy mobatok sa mga insekto.
Tungod niini, dili na kinahanglang mogamit pa og pesticide ang mga mag-uuma ug mapakusog pa ang produksyon.
Base sa pagtuon sa mga eksperto, daku usab ang makuhang nutrisyon gikan sa mga GMO products.
Samtang nagpadayon usab ang pagpaningkamot sa DA aron hingosgan pa ang sektor sa agrikultura gamit ang bag-ong teknolohiya. (PIA7-Bohol/ECB)