TAGBILARAN CITY, Bohol, Dec.11 (PIA)–Si Presidential Communications Operations Office (PCOO) Sec. Sonny Coloma mi-agda sa mga public information officers (PIOs) sa paglantaw sa website sa Philippine Information Agency (PIA) diin makita ang geohazard maps nga nagpakita sa mga lugar nga kuyaw sa pagdahili sa yuta ug pagbaha matag rehiyon hangtud na sa mga lalawigan.
Sa paglantaw sa geohazard maps, ang mga PIOs makatabang gayud og daku sa pag-edukar sa katawhan ilabi na kadtong mga nagpuyo sa danger zones o kuyaw nga dapit kun unsay buhaton kun adunay nagkaduol nga bagyo, sigun pa ni Coloma.
“In the upper right corner of the website is written ‘geohazard maps,’ which you can just click wherein you can also choose which region down to province you want to check on regarding the susceptibility of flooding and landslides,” matud pa ni Coloma.
Ang kalihim sa PCOO maoy pinasidunggang dinapit atol sa Information Officers’ Year-end Conference and Awards 2012 niadtong Disyembre 7 nga gipahigayon sa Nature’s Village Resort sa Talisay City, Negros Occidental.
Kapin sa 100 ka PIOs gikan sa nagkalain-laing ahensiya sa gobyerno gikan sa rehiyon 6 ang nitambong sa maong kalihokan.
Si Coloma nipadayag sa iyang kasub-anan sa mga namatay sa bagyong Pablo nga nikabat na karon sa 714 samtang 890 pa ang gipangita diin kadaghanan niini taga Compostela Valley.
“Compostela Valley is an accident waiting to happen as based on the geohazard map alone, it is a very critical area with high susceptibility of landslides,” pagbutyag ni Coloma.
Ang geohazard maps gi color-coded aron pagtumbok sa mga lugar nga kuyaw sa pagdahili sa yuta ug pagbaha. Pula (red) ang kolor sa mga high susceptibility area diin nabutang ang Compostela Valley, samtang berde (green) ang kolor sa moderate susceptibility ug dag (yellow) sa low susceptibility to landslides ug flooding.
Gitumbok ni Coloma nga kun gigamit lamang ang geohazard maps nga gipagawas sa Mines and Geosciences Bureau sa Department of Environment and Natural Resources (DENR), nalikayan unta ang trahedyang nahitabo sa Compostela Valley.
Gihangyo ni Coloma ang mga PIOs sa pagtabang sa pag-edukar sa publiko sa kamahinungdanon sa geohazard maps aron malikayan ang trahedya kun adunay bagyo. (PIA-Bohol/ecb/I-gg)